Denne skabbsjuke reven er observert i Rosendal

I førre veke vart ein tydeleg skabbete og slunken rev observert på bakkane ovanfor kyrkja i Rosendal.

Og sjølv om eit slikt syn har vorte sjeldnare dei siste åra, høyrer viltnemnda i Kvinnherad kommune stadig om folk som observerer skabbrev ulike stadar i kommunen.

– Vi har hatt skabb på rev i Kvinnherad i mange år, så det er ikkje noko uvanleg syn. Men det har vore mykje mindre dei siste åra enn det var før år 2000. Men enkelte tilfelle vert observert frå tid til annan, som for eksempel her i Utåker-området, som eg held til. Her vart det rapportert om éin skabbrev i fjor, seier viltforvaltar Leif Trygve Varanes.

 

Pass på hunden din

Reveskabb kjem av ein midd som borer seg inn i dyrets hud og legg egg. Noko som påfører reven intens kløe og etter kvart tap av pels. Ofte kring halerota og nedover bakbeina, som også er tilfelle hos reven som er observert i Rosendal.

Men kva skal du gjera om du kjem over ein skabbsjuk rev?

– Det beste ein kan gjera er å skyta dei. Både for reven sin del og for å unngå vidare smitte. Skabben smittar godt over på hundar, så ein bør ikkje sleppa skabbreven inn i huset sitt eller la hunden gå bort til dei, for å seia det sånn, seier Varanes.

Sjølv om skabb betyr døden for reven, betyr ikkje det at det er like farleg for hundar. For mennesket sin beste venn er det nok med behandling av veterinær om han fyrst er så uheldig og vert smitta.

 

– Spør naboen

Sjølv har ikkje viltnemnda eigne rutinar på å handtera skabbrev, så det beste tipset Varanes kan gje er å ta kontakt med ein kjenning du veit jaktar.

– Snakk til ein jeger i nabolaget. Dei fleste av oss har nokon kjenningar som driv å jaktar litt. Å få dei til å ta seg av reven er nok det beste rådet eg kan gje. Etter han er avliva så er det best å brenna han, seier Varanes.

Ein hardt angripen skabbrev søkjer ofte ly i uthus eller liknande. Og sjølv om du synst synd på den, er det ikkje mat han treng.

– Nei, det er ingen grunn til å mata han. Det beste for reven er å verta avliva. Har dei fyrst fått skabb så er det den vegen det går til slutt uansett, sluttar Varanes.