Berre nokre timar igjen: Stem på Årets namn i Kvinnherad 2022

For trettande gong skal Året namn i Kvinnherad kårast. Åtte verdige kandidatar til tittelen er funne fram.

Grenda-lesarane skal også i år kåra Årets namn i Kvinnherad. Etter ein nominasjonsrunde står det no mellom åtte verdige kandidatar. Kven som går til topps er det du som avgjer.

Frist til å røysta er 27. desember kl. 09.00. Skjema til å stemma finn du nedst i saka.

Tormod Myklebust

Bussjåføren frå Uskedalen har gjennom mange år brukt mykje av fritida si på å hjelpa fattige i Ukraina. I år fekk dette arbeidet ein ekstra dimensjon og eit ekstra alvor, etter at Russland invaderte landet. Tormod køyrde seinast i november eit stort lass med naudhjelp ned til Ukraina, og er no i gang med å samla inn utstyr slik at innbyggjarane kan halda varmen gjennom vinteren.

Ragnhild Femsteinevik

Hatlestrendingen har allereie ein lang karriere bak seg i skisporet, og har vore nominert til årets namn tidlegare for sine sterke prestasjonar. Men no i haust har det verkeleg teke av for skiskytaren. Ho er kome inn i varmen på det svært sterke norske landslaget, og får gå verdscuprenn. For nokre veker sidan leverte Ragnhild ein feilfri etappe under stafetten i Kontiolahti i Finland.

Arne Torget

Han har i alle år hatt ein stor tilhengarskare lokalt i Kvinnherad og Sunnhordland. Men etter suksessen i Norske Talenter for nokre år sidan, er stuntpoeten og revyartisten blitt lagt merke til over heile landet. Nyleg lanserte Arne si fjerde bok, «Kanskje fuglane vett?», og allereie er opplaget i ferd med å bli utseld. Tidlegare i haust samarbeidde han med Leirvik mannskor og Ole Bergesen om framsyninga «Landgang».

Heildagsskulen på Hatlestrand

Då Kvinnherad kommune jakta på ein skule som ville vera pilot for heildagsskulen, valde Hatlestrand skule å slå til på tilbodet. Det har dei ikkje angra på. Pilotprosjektet har ført til nasjonal merksemd, med oppslag i aviser og fjernsyn, og til og med besøk av kunnskapsministeren. Rektor Lilli Britt Urheim er no tydeleg på at ho ynskjer at prøveperioden vert utvida til fem år.

Synne Bjørnebøle

Halsnøy-jenta Synne Eide Bjørnebøle hadde sitt store gjennombrot på fotballbanen i 2022. Midtbanespelaren var heilt sentral for Åsane då klubben for fyrste gong rykte opp til Toppserien. 26 kampar og to mål noterte Synne seg for, og vart med rette også tildelt plass på årets lag av fagekspertane. Ho har no spelt tre sesongar for Åsane. Frå tidlegare er ho oppført med A-kampar for Stord og ungdomsfotball for Trio og Halsnøy.

Festidalen

Gjennom mange år har Festidalen trassa lugubre vêrmeldingar for å gje både kvinnheringar og tilreisande store musikalske opplevingar på jordet på Dønhaug. Heller ikkje to år med pandemi knekte dei ivrige eldsjelene. Difor var det særdeles velfortent at comebacket i 2022 vart krona med blå himmel, publikumsrekord og artistar i toppform. Mellom anna Madrugada og Gabrielle sytte for minneverdige show.

Anders Totland

2022 har blitt det definitive gjennombrotsåret for forfattaren frå Valen. 36-åringen har gitt ut 15 bøker så langt i sin karriere, men ingen av utgjevingane før haustens «Til jord skal du bli» har vore i nærleiken av den suksessen Totland no opplever. Boka er på bestseljarlistene i Norge, er høgaktuell for lansering utanlands og skal filmatiserast, og Totland har blitt eit husvarmt namn landet over.

Jarle Larsen

Frå sin posisjon som ambulansesjåfør har Jarle Larsen med stort engasjement og frivillig innsats gjort mykje for å heva nivået på nødetatane i Kvinnherad. Fleire gonger har han eigenhendig sytt for øvingar på redningssituasjonar saman med både luftambulanse og ambulansebåten, seinast i august i Høylandssundet. Utstyr som varmesøkande kamera, drone, øvingsdukker og ATV har han fått finansiert via søknader i regi av velferdslaget til Husnes ambulansestasjon.