– Det er for komplisert å satsa i Kvinnherad

Leif Sverre Enes (H) likar sjølvsagt ikkje at folketalet går ned, og tykkjer mellom anna at Fylkesmannen skal ha ein del av skulda.

– Dette er vel som forventa, og i samsvar med trenden vi ser over heile landet, seier Leif Sverre Enes når Grenda orienterer han om dei ferske folketala.

Enes er nok den politikaren som oftast har snakka om folketalsutviklinga frå talarstolen i rådhuset. Og alltid har han vore optimist. Det er han framleis.

– Det er ikkje dramatiske tal som er lagt fram, men eg synest ikkje det er kjekt når folketalet går ned. Elles er det jo ein generell trend at fødselstala minkar i heile Europa og at mange flyttar til byane. Kvinnherad er såleis ikkje unik, tvert om er det meir unikt at vi har klart å halda stand, seier han.

For å få fleire til å busetja seg i Kvinnherad, meiner han det fyrst og fremst handlar om tilrettelegging av næringsareal og bustadareal. Dessutan må ein leggja tilhøva til rette for pendlarane.

– Det er enormt med folk som bur i Kvinnherad og pendlar til arbeid andre stader. Denne gruppa er svært viktig for oss. Det er difor avgjerande å leggja til rette med godt kollektivtilbod og rikeleg med parkeringsplassar, slik at dei ikkje vel å flytta fordi det vert for plagsamt å reisa til og frå, analyserer Enes.

 

Urørt natur

I kjent stil kjem han også med eit spark mot Fylkesmannen.

– Fylkesmannen kompliserer alt. Viss nokon prøver seg med tiltak i urørt terreng, så blir det fort veldig komplisert ute i distrikta. I tillegg har vi alt det med flaumfare og strandsone. I Kvinnherad har vi naturressursar og areal,  men mange kvir seg for å setja i gang. På skjemt plar eg seia at i Kvinnherad er det for mykje urørt natur og for lite folk. Mange seier at innbyggjarane er opptekne av urørt natur, men sjå berre på Nederland. Der bur det mykje folk, men det finst ikkje urørt natur, filosoferer Leif Sverre Enes.