– Det vil sikkert gå heilt fint

For ein del tiår tilbake var det store demonstrasjonar mot vasskraftutbygging. Argumentet var at denne utbygginga kom til å rasera norsk natur. Vi kan no sjå at det ikkje blei noka rasering. Menneske og dyr lever fint i harmoni med vasskraftanlegga. Og slik vil det sikkert bli i framtida når ny vasskraft skal byggjast ut. Erfaring syner at det vil gå heilt fint.

Då vi fann olje i Nordsjøen var det dommedagsprofetar som spådde at livet i sjøen kunne bli rasert som følgje av store oljelekkasjar. I ettertid ser vi at knapt ein fisk har krepert der ute. Utnyttinga av olje og gass har gått heilt fint, og erfaring tilseier at slik vil det også gå i framtida.

No er det nokre som måler fanden på veggen i samband med utbygging av vindkraft. Det er snakk om at norsk natur kjem til å bli rasert. Ei omfattande atomkraftulukke kan rasera ein heil landsdel. Vindkraft er i grunnen ufarleg. Noreg er så stort at sjølv ei storstilt utbygging av vindmøller vil berre omfatta nokre promille av landarealet. I det langstrekte landet vårt finst det sikkert mange stader der turbinane etter måten kan stå usjenert. Det er dumt å byggja ut dyre anlegg til sjøs. Hydro Husnes treng så billeg straum som mogleg for å konkurrera. Det same gjeld sikkert Magnar Hellesøy sine nye båtar som skal gå på hydrogen. Dei skal bli ein del av det grøne skiftet. Framstilling av hydrogen krev mykje energi. Vi skal vera glade for at Noreg har den beste vindkraftressursen i Europa. Vindkraft til lands er den nye «olja», og ei framtidig utnytting av den kjem sikkert til å gå heilt fint.

 

Av Reidar Algerøy

[gravityform id="11" title="true" description="true"]