Dette er dei nye nasjonale anbefalingane

Statsminister Jonas Gahr Støre seier at alle over 18 år skal få tilbod om oppfriskingsdose innan påske. Regjeringa innfører også nasjonal anbefaling om munnbind der ein ikkje kan halda avstand.

– Hovudbodskapen min er at pandemien ikkje er over. Den er over i ein ny fase. Vi skal gjennom ein vinter som vil krevja at vi held kontrollen, for smitten vil vera blant oss.

Det sa statsminister Jonas Gahr Støre (Ap) då han orienterte Stortinget om status og vidare løp for regjeringa si koronahandtering tysdag føremiddag.

Her la han også fram dei nye nasjonale reglane og anbefalingane som han saman med helsemyndigheitene vil leggja fram på ein pressekonferanse klokka 12 onsdag.

– Vaksiner deg

Eit klart bodskap statsministeren kom med var vaksinering.

– Mitt klare bod til alle som har takka nei er; takk ja, og vaksiner dykk, seier Støre.

Han oppmodar alle over 65 år til å takka ja til oppfriskingsdosa, og seier at alle over 18 år skal få tilbod om ei tredje dose innan påske.

– Klarer vi det, reduserer det behovet for inngripande tiltak betrakteleg.

Koronastrategien til regjeringa har som mål å hindra ei overbelastning på sjukehusa. Det skal dei sørga for med sine nye reglar og anbefalingar. Der i blant ei nasjonal anbefaling om å bruka munnbind der ein ikkje kan halda avstand. Mellom anna i butikkar, på kollektivtransport og taxi.

Støre seier også at dei er klare for å innføra strengare tiltak dersom smittesituasjonen krevjar det.

Dei nye nasjonale anbefalingane:

* Bruk munnbind i kontakt med helse- og omsorgstenesta og på kollektivtransport, i taxi, i butikkar og på kjøpesenter der det ikkje er mogleg å halda avstand.

* Vidareføring av anbefalinga om jamleg testing av skuleelevar i område med aukande smittespreiing og høg belastning i helse- og omsorgstenesta.

* Regjeringa bed om at kommunar med auka smitte og høg belastning i helsetenesta vurderer auka bruk av heimekontor.

Dei nye nasjonale reglane:

* Bur du med ein som er smitta, må du halda deg heime i karantene til du har fått svar på ein negativ test. Dette gjeld for vaksne, anten dei er vaksinert eller uvaksinert. For å sleppa karantene må vaksinerte testa seg på nytt seinast etter sju dagar. Uvaksinerte må testa seg dagleg i sju dagar med hurtigtest eller annakvar dag med PCR-test. For barn er ikkje dette ei plikt, men ei anbefaling.

* Blir du smitta av covid-19, må du vera isolert i fem dagar. Dette gjeld uavhengig av om du er vaksinert eller ikkje. Fram til i dag har kravet vore to dagar for vaksinerte utan symptom. I tillegg må du ha vore feberfri i 24 timar før du går ut av isolasjon.