– Dill jubilerer!

Dill er 10 år og skal feira hendinga med Peder Sjo Slettebø som festtalar, les eg i Kvinnheringen.

Peder var som ordførar og vanlig kommunestyrerepresentant, etter eiga utsegn, sterkt engasjert i Dill og selskapet sitt føremål; å syta for at gamle og sjuke skulle få best mogleg og nykokt mat.

Han heldt ein glødande appell i samband med ein fakkelaksjon som vart skipa til som støtte for tiltaket. Men det skulle visa seg at det meste låg utanpå.

Saka om mat til gamle og sjuke har diverre ei tragisk historie i Kvinnherad.

Hausten 2016 hadde Dill, der underteikna var med, fleire møte med ordførar Peder Sjo Slettebø. Han la for dagen stor iver for å få Dill til å løna seg og at varm mat til Halsnøytunet skulle leverast av Dill som hadde lang røynsle og «eit godt ord på seg».

I løpet av hausten hadde vi fire møte med ordføraren, og alle hadde den klare konklusjon: «Varm mat til Halsnøytunet skulle bli levert av Dill». Siste møtet avslutta vi med «shake hands». Saka var i boks, vi var einige.

Dagen der på reiste formannskapet i Kvinnherad til Tysnes og av heldt møte. Resultatet derfrå kjenner vi, leveranse frå Dill nedstemt.

I det påfølgjande kommunestyremøtet oppmoda kommunestyrerepresentanten Synnøve Solbakken ordføraren om ei orientering om «matsaka». Talen til Peder frå kommunestyrets talarstol blei ei respektlaus, verbal utskjelling av oss som hadde stått i brodden for at gamle og sjuke skulle få nykokt mat. Etter dette trekte heile styret i Dill AS seg.

Denne mannen er altså invitert som festtalar når Dill rundar 10 år.

Eg kjem ihug Kjell Borten sine ord: «Eg er djupt skuffa og vonbroten». Eg trekkjer tilbake påmeldinga om å delta på festen.

 

Lesarbrev av Gerhard Eide