Dobbelt ministerbesøk til Kvinnherad

Både statsminister Erna Solberg og kulturminister Linda Hofstad Helleland kjem på besøk til Kvinnherad på fredag.

Ordførar Peder Sjo Slettebø gler seg storleg til at statsministeren og kulturministeren kjem på besøk.

– Begge ministrane er i området den helga, og dei vitjar oss i same rennet. Me har sagt til kulturministeren at me ynskjer besøk av ho, og ho har funne fram til denne datoen. Når det gjeld Erna Solberg, så har ho alltid ein ståande invitasjon til å koma. Også ho har funne det passande denne dagen, fortel Slettebø.

Han ser det som udelt positivt å få visa fram kommunen for sentrale politikarar, samt å få visa fram lokalt næringsliv og lokale tiltak som fortener litt ekstra merksemd.

– Det er alltid nyttig å få besøk av ministrar. Me nyttar også høvet til å fortelja dei om andre saker, det blir ikkje berre kultur når kulturministeren er her, seier han.

Harding og Hydro

Detaljar om programmet til kulturministeren vert ikkje offentleg før på måndag, men på nettsidene til Kvinnherad Røde Kors står det at ho skal på besøk til dei. Statsministeren skal treffa Hydro Husnes og Harding.

– Reint praktisk vert det truleg slik at møtet med næringslivet vert gjennomført samla hos Harding. Eg ynskjer at dei besøka blir opne, og reknar med at dei blir det, seier ordføraren.

For kommunen blir rammevilkår, konkurransekraft, utfordringar og behov tema.

– Me vil seia litt om kva me jobbar med i Kvinnherad. Erna kjenner oss godt, men det er likevel kjekt å få presentert oss for ho. Samferdsle og kommunikasjonen med omverda, eller mangel på sådan, blir nok mest vektlagt. Samarbeidet med Stord om E39-tilknyting, Sunnhordlandsdiagonalen, Hordalandsdiagonalen, sambandet aust-vest og våre eigne prosjekt i Kvinnheradpakken. Det er mykje å ta av, sluttar Slettebø.