Dyr overnatting i Odda

Like over midnatt vart politiet tilkalla til ein utestad i Rosendal, der to personar skapte trøbbel.

Dei var begge rusa og oppførte seg på ein slik måte at innehavarane av utestaden ønskte dei på dør. Politiet gav difor bråkeduoen eit pålegg om å forlata staden, noko dei ikkje heilt skjønte. Begge kom tilbake, og då politiet på ny gav dei beskjed om å gå slo den eine av personane seg vrang.

– Den eine personen vart køyrt til arresten i Odda og vart dimittert litt ut på søndagen med eit førelegg på 6.000 kroner. Han andre forstod etter kvart beskjeden frå oss, og har erfart at det kan lønna seg å etterkoma eit pålegg frå politiet, seier politibetjent Torgeir Fosse ved Kvinnherad lensmannskontor.