– Eg er ikkje vondsinna

Eg er ikkje vondsinna, eg ber heller ikkje på nokon måte nag til deg eller har kalla deg, eller andre som er med på planen din for kriminelle. Alle som kjenner meg veit at slik ordbruk ikkje er min stil. Det er heller ikkje det eg har sagt eller meiner. Ankepunkta eg gav skriftleg og munnleg til lokalpressa ligg tilgjengeleg på www.fkvener.com, saman med annan informasjon som folk flest kan gjera seg kjent med. Eg har brukt ord som skandaløs og sjokkerande om prosessen som er sett i gang for å gjera heile Fjelberg Kraftlag til historie, «slakta grisen» som du gjentatte gonger har formulert det. Dette meiner eg å ha dekning for. Eg har 4 store ankepunkt:

 

Organisasjonsmessig:

Medlemmene har ikkje fått vore med og signalisert noko om retning og vegval.  Du lova oss som var til stades på årsmøtet i juni, at skriftleg materiell med analysar og alternativ som ein kunne samanlikna skulle komma ut i god tid før neste møte.  Ikkje ei skriftleg linje er kommen!  Å senda ut ein underskriven transaksjonsavtale med Haugaland Kraft, kort tid før medlemmene skal sei nei eller ja er ikkje ei utgreiing. Liknar ikkje ei utgreiing. Det er eit «fait accompli». Får ein ikkje 4/5 dels fleirtal, går styret av. Finst det nokon andre eigarar i norsk organisasjons- eller næringsliv som vert handsama på denne måten, når verdiar for over 300 mill. står på spel?  Då lyt ein sjå litt morsk ut i avisa!

 

Nettleige:

Akkurat som med det økonomiske, er heller ikkje utsiktene framtidig nettleige utgreidd. Folk skal berre tru påstanden om at eit nettselskap med vel 60 000 kundar «på sikt» vil gje like låg nettleige som eit med over 220 000 kundar.  Godt at ein iallfall tok med reservasjonen «på sikt». Kvinnherad Formannskap har fått seg førelagt ei uavhengig utgreiing, rett nok betalt av BKK, som syner korleis NVE sine tal og prognosar, der ein m.a. tek omsyn til investeringsbehova i dei to selskapa vil utvikla seg.  Det ligg eit bilete av denne prognosen ute på den same nettsida.  Det ser ille ut for både vanlege folk og verksemder, dersom ein trur iallfall litt på det som ekspertane reknar ut. Her har ikkje styret gjort jobben sin.

 

Økonomi:

Du kallar det ei verdivurdering når det er henta inn bod frå to konkurrentar! Finn du ein økonom som vil kalla noko slikt ei verdivurdering?  Skal ein ut og selja alt eller deler av ei formue verd 100-vis av millionar, lyt ein iallfall vita kva verdiar ein sit på. Utan å vera fagøkonom ser ein at aksjane i SKL, Kvinnherad Breiband og anna formue som ein ikkje treng å avhende vil gje kraftlaget ei avkastning godt over 8 mill. kroner i 2018.  Desse pengane går rett inn på konto hos Haugaland Kraft til våren. Og i alle år frametter.  I byte har styret sikra oss ein aksjepost i Haugaland Kraft, der ein kan rekna ut at det vert ei årleg avkastning eit stykke inn på 4. mill. talet.  Skilnaden kan lett verta heilt opp i 50%, då SKL går mot rekordoverskot i 2018.  Eg kallar dette «worst deal ever». Reknestykket ligg på nemnde nettside fkvener.com og på Facebook, søk fkvener.

 

Moral og etikk:

Somme likar å kalla formuen bygd opp i Fjelberg Kraftlag for «herrelause pengar» som ein helst vil spreie ut og bli kvitt! Ein gong for alle, lovleg eller ikkje! Eg trur derimot at mange medlemmer med sunt bondevett skjønar at dette korkje er rett eller rimeleg.  Dei skjønar at ei så stor formue kan utretta mykje godt for medlemmer/aksjonærar og næringsliv, for organisasjonslivet og mange samfunnsnyttige tiltak, for samfunnshus, bedehus, idrett osv.  – i generasjonar frametter! At dette brått skal vera nærast umogeleg å få til på ein måte som gjer at det vert «fred mellom folka» i bygdene våre; at formuen som generasjonane før oss bygde opp i dag er mykje meir av eit problem enn ei velsigning, kan eg ikkje med min beste vilje skjøna!  Det krevst ikkje meir enn gode vedtekter, klåre køyrereglar og eit aktivt organisasjonsmessig demokrati mellom aksjonærane. Og eit styre og leiing som tek ansvaret sitt på alvor!

 

Advokat Knud Lorentzen har sett nærare på prosessen og planane frå styret. Han nøler ikkje med å kalla framgangsmåten som medlemmene vert invitert til å vera med på for lovstridig. Han skriv følgjande:

 

Det føreligger neppe tvil om at det som styret og ev. årsmøtet er i ferd med å gjera er i strid med begge lover dersom det føreligger hemmelege avtaler som skal gjerast gjeldande på eit seinare tidspunkt og kor intensjonen med omdanning er å utbetale formuen til medlemmene i strid med samvirkelovens regler om bruk til samvirkeformål eller allmennyttige formål.

Personane som medverkar til dette vil komme i ansvar og kan eventuelt også straffes. Også HK vil etter min mening kunne komme i ansvar. Utan å kjenne kommunelova regler antar eg at også representantar for kommunen vil kunne bli ansvarlege sjølv om ansvaret i slike saker sannsynlegvis blir pulverisert

 

Her skal altså me som medlemmer «halda kjeft» om hensikta med transaksjonen og tilbakekjøpsklausulen frå Haugaland Kraft, inntil me er utanfor radaren av dei som er sett til å passa på at norsk lov vert følgd?   Kor lenge skal folk måtta teia for å få pengar på kontoen?

Inntil det motsette er bevist, kan eg ikkje tru at eit velrenommert advokatfirma som Schjødt og Tommesen kan ha kjent til styret sin hensikt når dei gav «grønt lys» for ein slik framgangsmåte!  Har dei likevel gjort det, mot betre vitande,  vil både min og andre sin respekt for norsk advokatstand minka enno meir.

 

Lesarbrev av Per Ove Kviteberg.

Høylandsbygd 8. november 2018