– Eg måtte dobbeltsjekka om det var rett beløp

Senterleiar Terje Børtveit ved Husnes Storsenter fekk hakeslepp då bestillinga frå ei anonym bedrift i Kvinnherad tikka inn i innboksen tysdag.

«Tohundreogfemtitusen takk til «kunden» som i dag har kjøpt mange sentergåvekort på Husnes Storsenter for totalt 250.000 kroner til sine kollegaer. Det kallar vi lokal handel», melde Husnes Storsenter på Facebook tysdag ettermiddag.

Då hadde senterleiar Terje Børtveit måtta dobbeltsjekka minst ein gong om det ikkje var ein null for mykje i bestillinga.

– Eg måtte sjølvsagt dobbeltsjekka om dei hadde skrive rett beløp, for det var jo ganske rause beløp per gåvekort, smiler ein svært takksam Børtveit.

– Det betyr mykje at nokon vel å gjera det på denne måten. Difor valde vi å gå ut på Facebook for å takka kunden, sjølv om vi ikkje brukte namnet. Ein slik handel sende veldig gode signal i nærmiljøet, og vi håpar at fleire tenkjer på same måte, seier Børtveit.

 

30 prosent fleire kundar

Den store gåvekorthandelen gir ein kickstart på julegåvehandelen på senteret. Parallelt er den med på å auka omsetnaden i den såkalla «Black Week». Ei handleveke som for senteret erstattar den tradisjonelle handlehøgtidsdagen «Black Friday».

– Vi køyrer, som dei fleste andre «Black Week» dette året, den tradisjonelle fredagen utgår. Det betyr òg at tilbode til butikkane vil variere, nokon frå dag til dag, andre heile veka, seier Børtveit.

Fleire senter rundt om i landet har bestemt seg for å køyra ei heile veke med handel i staden for å konsentrera alle tilboda til den eine fredag, og med det spreia kundane utover veka i ein periode kor det å halda avstand er heilt nødvendig.

– Sjølv om vi ikkje forventar noko trengsel på fredagen som kjem, så gjer vi som vi har gjort gjennom heile koronaperioden. Vi oppmodar kundane om å halda avstand og visa omsyn til andre. Bruk gjerne heile opningstida vår, seier Børtveit og legg til at kundetalet på senteret har stige med så mykje som 30 prosent denne veka samanlikna med veka før.