– Ei belastning for alle partar

Måndag var takstmann på synfaring for å vurdera vasskadane på Hatlestrand skule. Ein vonar no at mesteparten av reperasjonsarbeidet kan bli utført i haustferien.

Hatlestrand skule måtte som kjent utsetja skulestarten med éin dag, grunna omfattande lekkasjar i samband med renoveringa av taket. Entreprenøren ACS Bygg AS frå Asker har sine forsikringar hjå Tryg forsikring, og måndag sendte dei ein takstmann på synfaring saman med Kvinnherad kommune.

– I nedste del av veggane er det ein del fukt. Der må det opnast opp og luftast ut, fortel Knut Bjørgvik, verksemdsleiar for brann, bygg og eigedom.

– Er det omfattande skader?

– Ja, det kan ein seia, for skadane er spreidd over heile huset. Vi slepp å riva veggane, men den nedste halvmeteren må opnast opp, seier Bjørgvik.

 

Haustferien

Før vølinga kan ta til, må endeleg takst føreliggja. Dessutan skal ein føreta ein full gjennomgang av alle fagområde, som til dømes brannvarsling, ventilasjon og elektro.

– Vonleg kan ein starta opp 14 dagar før haustferien med å lufta ut, slik at reperasjonane kan skje når skulen har ferie (veke 41). Ein skal prøva å gjera det ferdig i løpet av den veka, fortel Bjørgvik.

Kvinnherad kommune skal i utgangspunktet ikkje li særleg økonomisk skade på grunn av uhellet, det er ei sak mellom entreprenør og forsikringsselskap. Og alt oppfølgingsarbeidet som Bjørgvik og kommunen må gjera, fakturerer dei Tryg forsikring time for time.

– Angrar de på at kontrakten vart gitt til eit heilt nytt selskap utan eigne tilsette?

– Eg vil påpeika at ACS Bygg har samarbeidsavtale med eit morselskap. Klart det har vore ein ulempe for oss at det skjedde det som har skjedd, og vi skulle helst sett det ugjort. Men ein kan ikkje vita at det ikkje hadde skjedd dersom nokon andre hadde fått oppdraget. Å opna opp takkonstruksjonar er trass alt det mest sårbare arbeidet ein kan gjera. I ein anskaffingsprosess kan vi dessutan ikkje anta eller tru, men må halda oss til regelverket og fakta, svarar Bjørgvik.

 

Lite erfaring

På Hatlestrand skule låg det to lag med takpapp; det originale og eitt som kom på plass kring år 2000. Under arbeidet no vart det teke vekk for mykje av det nyaste, for det viste seg at det opphavlege var i dårleg stand.

– Entreprenøren hadde ikkje kalkulert med den norske sommaren 2015. Dei har sjølve gitt uttrykk for at slikt vêr såg dei ikkje kome. Samstundes hadde dei nok for lite erfaring med vestlandsvêret, vurderer Knut Bjørgvik, som tykkjer saka er ei belastning for alle partar.

 

– Må gjera det beste ut av det

Rektor Edvard Jarle Tveit på Hatlestrand skule vonar det ikkje går så lenge før alt er i normalt gjenge att.

– Det er ikkje berre berre å driva skule midt i ein byggjeplass, seier han.

– Når reperasjonane skal skje, kan det bli ei utfordring å halda skulen i gang. Men vi har eit stort areal å ta av, så planen vert nok å ha skule i ein del av bygget medan dei fiksar den andre delen. Arbeidarane lyt nok gå over heile skulen, for det kom vatn over alt. Det er mange veggar og mykje golvbelegg som må ut, vurderer han.

Rektoren tykkjer også litt synd på entreprenøren.

– Dette er jo ikkje kjekt for nokon av partane, seier Tveit, som tykkjer det nesten er litt spenning i å koma på arbeid kvar morgon og sjå korleis det ser ut.