– Ei bru vert bygt for å vara i minst 100 år – det er framtidsretta det Svar og sluttinnlegg til Ivar Vaage

Ivar hevdar eg bagatelliserer og bortforklarar dei store naturinngrepa ved Sunnfast. Nei, eg seier det vil føra til naturinngrep, men at det må vera mogleg å finna løysingar som er til å leva med til dømes med meir tunnelar. Når ein byggjer nye vegar i dag, vert det lagt stor vekt på fine gråsteinsmurar og avbøtande tiltak. Derfor vil vegen bli den finaste i kommunen. Ser me på heile den samanhangande utmarka og turområdet vest for FV44, frå Røyrvik i nord til Bjelland i sør. Eit areal på ca. 2,5 kvadratkilometer, så vil vegen utgjera berre 1% av dette arealet. Litt vil det altså vera att til å gå tur i.

Når det gjeld gang og sykkelveg g/s-veg, så spelte me frå Kvinnherad inn at på kvinnheradsida vil ein kunne nytta eksisterande vegar og oppgradera tur og skogsbilvegar til g/s-veg nettopp for å gjera minst mogleg inngrep i naturen.

Det Ivar bagatelliserer, iallfall ikkje nemner, er kor avgjerande viktig det er med god samferdsle for ein kommune. Kvinnherad skal bruka mange hundre millionar til samferdsletiltak og bra er det. Men sambandet til E39, det viktigaste sambandet, vil vera like katastrofalt dårleg. Næringsliv og innbyggjarar lir kvar einaste dag under dette dårlege sambandet. Kva er Ivar si løysing?

Ivar ser ikkje ut til å la seg affisera av den alarmerande demografiske utviklinga i kommunen med stort fødselsunderskot og aukande gjennomsnittsalder. Nei her går det så bra så, meiner Ivar. På Stord blir det til samanlikning fødd dobbelt så mange som det døyr. Det er ikkje tilfeldig.

Ja, Sunnfast vil ved at ein mangedoblar bu og arbeidsmarknadsområda med rask veg til Bergen og Haugesund, vera nøkkelen og garantien for at Kvinnherad igjen skal bli ein livskraftig kommune med fødselsoverskot og folketalsauke. At Stord ikkje har lukkast i å utvikla handelsnæringa på Leirvik, gjer det ikkje mindre imponerande med all næringsaktiviteten og tusenvis av jobbar som er skapt nettopp som følgje av Trekantsambandet og det å ha E39 over øya. Den maritime industrien og den store næringsaktiviteten her ute er sjølve motoren i Sunnhordland der hundrevis av kvinnheringar har arbeidet sitt.

Ivar trur ikkje på Multiconsult, eller Mikroconsult som han vel å titulera dei, sine tal. Trafikktala er basert på SVV sine modellar der ein over eit stort geografisk område analyserer korleis trafikkstraumane endrar seg når eit nytt vegsamband opnar.

Snøggbåtane som Ivar ser for seg skal bli miljøvenlege, står for ein stor del av utsleppa i fylket. Sjølv om båtane skulle bli drivne av hydrogen eller batteri, så er dette ein enormt energikrevjande persontransport. Også å transportera bilar med ferje er svært inneffektivt. Det å transportera til dømes 50 bilar med ferja Ranavik-Skjersholmane tilsvarar energiforbruket av 1000 bilar som køyrer same strekninga på veg. Straum er ein avgrensa ressurs og må nyttast mest mogleg effektivt.

Snøggbåtane vil bli erstatta av komfortable, effektive og stillegåande elbussar som vil bruka knappe 25 minuttar frå rundkøyringa på Tofte til Leirvik over Sunnfast. Derfor vil Sunnfast, bygt for å vara minst hundre år, også føra til stor reduksjon i klimagassutslepp.

Når Gunnar Våge kan hiva seg i bilen sin og køyra frå Lyngstrand til Flesland på halvannan time over Sunnfast kva tid som helst i døgnet, mot i dag å vera bunden til ferjetidene og to og ein halv time reis og gjerne hotellovernatting, trur eg valet vil vera enkelt. Slik er det med revolusjonerande nye samferdsleprosjekt. Trafikkstraumane går kortaste vegen.

230 kroner er ein gjennomsnittspris for tunge og lette køyretøy. Bompengesatsen for personbil vil derfor vera vesentleg lågare enn dette. Etter 15-20 år er sambandet gratis. Alternativet er ferje og bompengar som billett til evig tid.

Me har stor tru på at me skal klara å finansiera og realisera ferjeavløysingsprosjektet, Sunnfast som vil vera det optimale sambandet mot E39. Skulle det likevel syna seg vanskeleg å finansiera Sunnfast, vil eit kort ferjesamband på 10-12 minuttar i same trase vera førebels det beste me kan få til. Då òg lyt me ha veg og i tillegg to nye ferjekaiar. Det som er sikkert er at det innan 10 år er ferjefritt mellom Stavanger og Bergen. Derfor må ein no arbeida målretta for raskast mogleg tilknyting til nye E39.

Ein arm E134 til Bergen vil kunna vera under planlegging i vegplanperioden fram til 2032, men vil sannsynleg ikkje vera ferdig før nærare 2040. Sunnhordlandsdiagonalen vil liggja svært godt an i denne konkurransen.

Sunnfast kan med godt samarbeid mellom Kvinnherad, Stord, Tysnes og Vestland fylke kunna opnast samstundes med opning av Hordfast og ferjefri veg Stord-Os i løpet av dette tiåret. Det skal me få til!

 

Av Håkon Røstbø

 

[gravityform id="11" title="true" description="true"]