– Eit paradoks at skulen er godkjent for hundre elevar

Kva kommunen hadde gjort om det framleis var skule på Tofte, var ei problemstilling som vart lufta under kvikkleiredebatten til formannskapet.

Det var Ove Lemicka (Frp) som tykte det var eit paradoks at skulebygninga, som Toftetunet AS no ynskjer å gjera om til leilegheiter, framleis er godkjent for skuleelevar. Ordførar Hilde Enstad (Ap) rekna med at kommunen hadde gripe inn om det framleis var skuledrift på Tofte då kvikkleireproblematikken aktualiserte seg med katastrofen på Gjerdrum for snart eitt år sidan.

– Eg trur at om det hadde vore skule der no, så hadde kommunen gjort tiltak. Truleg hadde skulen blitt stengt mellombels, for vi hadde ikkje teke risikoen på at det skulle gå liv tapt, sa ho.

Lemicka slo fast at om området ikkje har stabilitet, så kan ein korkje ha skule eller busetnad der.

– Eg vil minna om at området på Gjerdrum var friskmeldt heilt til det ikkje var friskmeldt lenger, analyserte han.