– Eit Samarbeidsråd med skremmande tendensar

Kvinnherad har lang fartstid i Samarbeidsrådet for Sunnhordaland. Det har vore ein arena for mange debattar til dels tøffe, men har gjeve brukbar utteljing for medlemskommunane. Eksempel: Trekantsambandet og Halsnøytunnelen.

Den siste tida synest eg at samarbeidet har utvikla seg negativt, har skranta og personleg tenkjer eg kva fordeler og tenester sit Kvinnherad att med? Har heile denne regionen gevinst, eller er det nokon som drar det lengste strået heile tida?

I førre veke vart mine antagelsar dessverre bekrefta. Ordførar frå nabokommune som sit i Samarbeidsrådet kontakta sentrale politikarar i Kvinnherad og truga med at dersom Kvinnherad ikkje trekte støtteuttalen til Indre Kyststamvegen, vart all støtte til Sunnfast stoppa. I tillegg vart ein utidig pressa frå andre som jobbar inn mot Sunnfast.

Synest dette er heilt uhøyrt, og tilliten står til stryk.

Kanskje det er på tide å vurdera dette samarbeidet.

Kvinnherad kommunestyre har einstemmig vedtak november 2011 som støttar Indre Trasé.

Kjem heller ikkje på saker dei siste åra der Kvinnherad har motteke noko draghjelp. Eit eksempel: Etter at ferja vart fjerna frå Leirvik har den segla sin eigen sjø. For samarbeidet og ein sterkare region, burde det vore fint for samarbeidet om nabokommune kunne ytt ca. 100 meter strandlinja. Ferja hadde halvert reisetida, halvert forureininga, senka reisestresset og styrka regionen. Sist, men ikkje minst: Realistisk, og gjennomførbart på kort tid, om lag 10 år.

Skal eit samarbeid fungera, lyt ein dela på goda og ikkje berre dra ein veg.

 

Av Øyvind Hardeland, (Ap).