Ekstramøte i formannskapet om Børneset

Ordførar Hans Inge Myrvold har kalla formannskapet inn til eit ekstraordinært møte på måndag. Førebels står berre éi sak på lista: Børneset.

Konkret dreiar saka seg om 2. gangs behandling av detaljreguleringsplanen for Børnes næringsområde i Uskedalen. Innstillinga frå kommunedirektøren lyder slik:

«Kvinnherad kommunestyre godkjenner i medhald av plan- og bygningslova § 12-12, forslag til detaljregulering for Børnes næringsområde, 134/34 m. fl. PlanID 20190006. Plankart, føresegner og planomtale er datert 16.02.2021. Reguleringsplan for Børnes, Uskedalen, planID 19780007, vert samstundes oppheva.

Vilkår:

Naustområde i Mørkevågen som er teke ut frå opphavleg planutkast, skal behandlast på eit seinare tidspunkt i ei ny sak. Rettshavarar og naboar skal underrettast i samsvar med reglane, og planen skal kunngjerast i lokalpressa og i kommunen sine elektroniske medium. Administrasjonen får fullmakt til å gjere tekniske justeringar av plandokumenta før kunngjering. Grunnlaget for kommunal eigengodkjenning er til stades».

Møtet skal i utgangspunktet føregå i kommunestyresalen i rådhuset, men kan på kort varsel bli flytta til Teams.