Elva fløymde over

I Storedale i Ølve kom det så mykje vatn etter torevêret at elva gjekk over brua.

 

– Det var gjort i løpet av ti minutt. Dalaelva reagerer så raskt på nedbør, at ho stig på eit blunk. Men så var det også heilt enormt kva mengder som ausa ned etter torebraket, seier Hans Storedale.

Han hadde nettopp vore i postkassen då styrtregnet byrja i 06-tida. På kort tid var elva så stor at ho gjekk ein meter over brua inn til garden.

– Det var berre så vidt eg fekk berga traktoren ut før garasjen var fylt opp med vatn. Det blir litt arbeid å rydda opp etterpå, for det kom vatn inn i løa også. Men forutan eit aggregat eg ikkje rakk å berga ut, trur eg ikkje det har gjort særleg materielle skadar her hos oss, fortel han.

Storedale har også vore innover skogsvegen deira og sett at vatnet har gjort noko skade der.

– Elva gjekk også over ei av dei kommunale bruene her i dalen, men ho er på veg ned no.