– Endeleg kjem debatten om Husnes helsesenter har den beste plasseringa slik det er i dag.

Etter at eg stilla spørsmål om opprusting av Husnes helsesenter i formannskapet 10. september  stadfestar kommunedirektøren at dette er utsett til 2021. Då er det tid for å diskutera lokalisering.

Ei samlokalisering mellom legevakt, ambulansestasjon og brann- redning på Husnes vil etter mi vurdering vera ei god prioritering. Slik får me flytta utrykkingskøyretøy vekk frå skule- og barnehageområdet, rundkøyring og fartsdumpar.

Ambulansestasjonen sin kontrakt går ut i 2026, då skulle det passa fint å byrje tenkja ny plassering.

Det er fleire alternativ til flytting for helsesenter, legevakt og ambulanseteneste. Ein interessant tanke er å samlokalisera med brannstasjon, då vil ein og liggja i nærleik til politi og me nærma oss eit beredskapssenter i Kvinnherad. Ved brannstasjonen vil det kunne leggjast til rette for helikopterlandingsplass.

Sjå til Os, no Bjørnafjorden kommune der blålysetatane er samla, brann og legevakt er i same hus og ein ser klare fordelar med det, dei blir betre kjend med kvarandre når dei øver saman. Ofte rykkjer dei og ut saman. Dei byggjer òg politistasjonen ved sida av no.

Andre alternativ kan òg komma opp i debatten. Å flytta helsesenteret til eit nybygg i Aksen kan og vera eit alternativ, det vil gjera det lettare for spesielt eldre som skal på apotek, slike tenester heng ofte saman.

Eit utgreiingsarbeid må gjerast med ulike alternativ til plassering, kostnader og moglegheit for parkering. Saman med helse- og akutt-tenesta kan ein komma fram til ei god plassering og utvikla vidare samarbeid med redningstenesta vår.

Husnestunet og andre kommunale tenester vil i framtida ha behov for meir plass, ved å flytta desse tenestene vil ein leggja til rette for det.

Arbeidarpartiet er klar for å ta debatten!

 

Av Synnøve Solbakken, Kvinnherad Ap.