Endeleg Skutefest

I to år har Skutefesten i Rosendal blitt avlyst, og arrangørane er difor glade for å endeleg kunne invitera folk og båtar til Skålafjøro igjen.

Skutene kjem siglande til Rosendal førstkomande fredag. Same ettermiddag opnar festivalteltet, der kvelden blir runda av med skutekro. Det er duka for skumringsblues, kor Dag Bergesen band skal spela.

På laurdagen blir det aktivitetar gjennom heile dagen. Blant anna skal Kristian Djupevåg fortelja om restaureringa av Gurine, og det blir skutedag i Skålafjøro.

Noko for alle

Her vil ein kunna bli underhaldt av Bergens Skipperforenings Shantykor medan ein vandrar mellom ulike salsboder, kikkar på båtmotorane som er utstilt eller let seg fanga av Sunde Kystlag eller Hiernagla Brenneri sine demonstrasjonar.

Sistnemnde aktør held til i Sveio, kor dei produserer whisky, gin, akevitt og rom. Akkurat kva dei skal demonstrera kan såleis bli spanande å få med seg.

Det blir vidare moglegheit for omvisning i Skaalurensamlinga, og ein kan sjå film i Folgefonnsenteret i løpet av laurdagen. På Skutedag-programmet står også knuteverkstad, så det skal truleg godt gjerast å keia seg om ein tek turen til festivalområdet.

Kortreist skutecountry

Laurdag kveld blir det nok ei skutekro i teltet, der Meirso Countryband spelar opp til dans.

– Det blir lettkledde damer i forteltet, og billettar i døra, lokkar bandet på ekte sjømannsvis.

Søndag blir festen estetisk og roleg avrunda med at skutene seglar innover eller utover fjorden att.