– Endeleg var dagen komen

Ved lunsjtider torsdag opna Vinmonopolet sin nye filial i Varehuset Rosendal.

Mange har sett fram til det som skulle skje torsdag føremiddag. At Rosendal endeleg skulle få sitt eige pol.

– Endeleg er dagen komen. Dette er noko som ein har for å få til i mange år, nokon har trudd at det ikkje var mogleg, medan mange har tenkt at dette skal vi få til. Og no er vi her, no opnar Vinmonopolet i Rosendal, sa ordførar Peder Sjo Slettebø som saman med Remi Nerhus stod for den offisielle opninga.

Æra for at det no er mogleg å kjøpa seg både vin og det som sterkare er i Varehuset Rosendal er det mange som må dela. Men særskild nokon fekk takk frå ordføraren.

– Eg skal ikkje snakka dykk trøytte, for vi får ikkje opna denne butikken fort nok. Men det å få eit pol betyr mykje. Ikkje berre for innbyggjarane som kan kjøpa seg noko godt å drikka til maten, men òg for dei som driv butikk her inne. Det betyr auka handel og det gjev eit meir komplett butikktilbod. Så eg vil eg takka alle dykk som står på kvar dag og driv butikk her i Rosendal, sa Peder.