Endra tilkomsten til ny barneskule

PTM-utvalet støtta administrasjonen sitt forslag, og vedtok samrøystes ei mindre endring i reguleringsplanen for den nye barneskulen på Husnes.

Det er Kvinnherad kommune sjølv som ynska endringa i planen. Konkret dreiar det seg om å flytta tilkomstvegen for varetransport, utrykkingskøyretøy og rørslehemma til skulen. Dette for å trekkja denne køyringa vekk frå gangvegen der elevane skal gå, og samstundes leggja til rette for vidare utvikling av vegnettet for framtidige bustader. Omlegginga skal også medføra ei føremon for naboane langs Stølshaugvegen, grunna lågare grad av sjenanse frå trafikken.

– Vi synest rett og slett det gjev betre tilkomst, opplyste sakshandsamar Jon Mikkel Sjo Prestegård til PTM-utvalet.

– Dette betyr at det blir sikrare for ungane. Men vil det gå utover arealet for ungane totalt sett? undra Wivian Markhus (Ap).

– Nei, det vil det ikkje, slo Prestegård fast.

Plansjef Rune Helland la til at omlegginga spesielt vil gjera det meir trafikksikkert for ungane som kjem frå Kaldestad-området. Han meiner det også opnar for nytt vegnett seinare.

– Eg trur dette er ei veldig god endring som vi vil ha mykje igjen for, analyserte han.