Enorm interesse for å hjelpa

Mange kvinnheringar har meldt seg til teneste for Kvinnherad kommune om dei skulle ha bruk for dei.

– Det har vore ei enorm interesse for å hjelpa i den potensielle kritiske situasjonen kommunen kan koma i, om koronaviruset spreiar seg meir lokalt og vi vil ha trong for fleire hender, seier seksjonsleiar for stab Gunn Fosse i ein uttale på kommunen sine heimesider.

 

167 personar

Både tilsette som ikkje jobbar i kommunen og kommunalt tilsette har meldt seg for å hjelpa til i ein eventuelt kritisk situasjon. Før fredag hadde 167 personar registrert seg inne på kommunen sitt digitale skjema, medan kommunen sjølv har ei oversiktsliste på kring 210 personar som er fordelt på ulike einingar innanfor helse og omsorg.

– Diverre har me ikkje høve til å ta kontakt med alle direkte, men alle som har fylt ut det digitale skjemaet er registrert, og vil bli kontakta om behovet tilseier det. Fram til no prioriterer kommunen å omdisponera eigne tilsette, skriv kommunen.

 

Bemanningsteam

Det er oppretta tre bemanningsteam som er plassert på Halsnøytunet, Husnestunet og Rosendalstunet. Det er dei teama som koordinerer og tek kontakt med dei ressursane ein måtta ha trong for til kvar ei tid.

– Det har vore mykje og kjapp opplæring i bruk av digitale verktøy, for at alle bemanningsteama kan arbeida å tvers med å halda oversikt på alle som har meldt seg. Kvinnherad kommune ynskjer å takka alle som stiller opp og som på kort varsel takkar ja til opplæring på nye arbeidsstadar og nye arbeidsoppgåver, skriv kommunen avslutningsvis.