«Epos» kjem på vårbesøk

Tysdag legg bokbåten «Epos» igjen ut på tur i Hordaland. Også denne sesongen kan tre stadar i Kvinnherad gle seg over besøk frå det flytande biblioteket.

I snart 60 år har bokbåten spreidd glede, inspirasjon, kunnskap og kultur rundt om i fylket. Denne våren har dei fått med seg Sofie og Elena frå høvesvis Sverige og Italia, ein duo som skal leika med det verbale og det musikalske språket.

– I programmet finn vi musikk som er stille og musikk som har sterke kjensler. Nord møter sør, mørke møter ljos og dei viser korleis musikken kan skapa venskap og føra folk saman, heiter det i ei pressemelding frå Hordaland fylkeskommune.

I Kvinnherad er det Ølve, Varaldsøy og Snilstveitøy som får gleda av å vera vert for «Epos». Varaldsøy får besøk måndag 11. mars, Snilstveitøy 14. mars og Ølve 15. mars.