Erna Solberg droppar påsketur til Bergen etter nye koronatiltak

Statsminister Erna Solberg (H) endrar påskeplanane på grunn av dei nye koronatiltaka. Turen til heimbyen Bergen blir droppa.

– Planane mine er å bli i Oslo. Eg hadde planlagt å reise til Bergen med familien, men med dei nye tiltaka har vi valt å bli i Oslo. Sjølv om vi har eigen bustad og ein hage som burde vore stelt i Bergen og kunne levd som i Oslo i Bergen, seier Solberg til Dagbladet.

Avgjerda vart teken i helga. Tysdag lanserte regjeringa innstrammingar i koronatiltaka. Frå torsdag blir det innført skjenkjeforbod, råd om maks to på besøk og ein ny tometersregel på nasjonalt plan.

Blir etterforska

Solberg blir etterforska for moglege smittevernbrot på Geilo i vinterferien etter at ho og familien samla meir enn ti personar på ein restaurant og i ei leilegheit på Geilo i vinterferien. Ho vart avhøyrd måndag.

– Politiet gjer jobben sin, og eg gjer jobben min, og eg har ikkje tenkt å komme med løpande kommentarar om dette, seier statsministeren.

Ektemannen Sindre Finnes vart avhøyrd måndag kveld. Ifølgje VG har ekteparet ikkje skaffa advokat.

Helseminister Bent Høie (H) opplyser til NTB at han ikkje endrar påskeplanane sine som følgje av dei nyaste tiltaka.

Vekependlar

– Eg er vekependlar så eg reiser heim til Stavanger i påska, slik eg òg gjer stort sett kvar helg. Det er i samsvar med nasjonale råd som gjeld arbeidsreiser og pendlarar. Dag Terje og eg blir truleg store delar av påska på hytta vår i Rogaland, seier Høie i ein e-post.

Regjeringa har ikkje rådd mot hytteturar, men oppmodar folk til å vere påpasselege med smittevern og følgje alle nasjonale og lokale råd og reglar.