Etterlyser bilete av gamle bilar

Har du bilete av gamle køyretøy i Kvinnherad, spesielt i Rosendal og omland? Og kva med bilete av kongebesøka i 1945 og 1947?

Som Grenda skreiv om ved eit par høve i fjor, driv bilentusiast Einar Gjertsen i Uskedalen på med eit par store prosjekt. Det eine prosjektet handlar om å finna bilete frå krigen og køyretøya som var i bruk då. Målet for det andre prosjektet er å laga ein komplett oversikt over alle bilane i Kvinnherad frå 1915 til 1965. På ganske så kort tid greidde han å samla bilete og fakta om nesten 500 lokale køyretøy. For å koma vidare i prosessen oppmodar Einar folk som sit på informasjon og bilete om å ta kontakt. Både personbilar, varebilar, bussar og lastebilar er av interesse.

– Eg skulle svært gjerne hatt bilete frå kongebesøka i Rosendal i 1945 og 1947, der blant anna Hans Huse køyrde kongen opp til Baroniet på vising. Skulle vera rart om ingen i bygda har noko frå desse hendingane, trekkjer Einar Gjertsen fram.

Arbeidet endar truleg med ei bok.