Fagdag for å redda villaksen
KVV sine 16 biologielevar var tysdag ute i felten for å bidra i arbeidet med å redda villaksen.
Biologigruppa til Kvinnherad vidaregåande var tysdag i Rosendal for ein fagdag kor dei tok teori ut i praksis. Dei 16 elevane starta dagen på Folgefonnsenteret kor dei fekk informasjon om kva genbanken er, før Øystein Skaala frå Havfordkingsinstituttet snakka til dei om situasjonen rundt om i elvane.
Artikkelen held fram under annonsen.
– Og no tek vi teorien ut i praksis. Vi er med Genbanken Hardangerfjord og skal redda villaksen, enkelt og greitt, seier biolog og lærar Kjersti Holmedal.
Gruppa på 16 delte seg opp i seks mindre grupper og stasjonerte seg vidare nedover Melselva i Rosendal.
– Vi plantar kassar med overskotsrogn, altså overskotet av gen frå stamfisken. Vi set den ut att i elvane for å prøva å redda den opphavelege villaksen, seier Holmedal.
Praksis
Og biologiklassen kunne ikkje vore meir heldig med vêret enn dei var denne tysdagen. I strålande sol sat elevane på huk rundt om i elva og grov ned små kassar med overskot av gen frå stamfisk i botn på Melselva.
– Det å få koma ut i naturen og få teorien i praksis er noko vi absolutt burde ha gjort meir av. Det er ein god måte å læra på, samstundes som dette prosjektet står veldig sentralt i læreplanen til elevane, seier Holmedal.
Ut ifrå fagdagen skal elevane skriva ein feltrapport frå det dei har vore med på.