Fann sauen stygt kvesta, men ingen har meldt om påkøyrsla

Sauen var i live, men hadde brekt fot og beinpipa stakk ut gjennom huda. – Heilt tydeleg påkøyrt, men ingen har meldt i frå, seier sauebonde Kathrine Haugland.

Bøndene som har sauer på sommarbeite i Bjørnebølsbeitet og Fjellhaugenbeitet, byrjar å merka konsekvensane av auka trafikk og turisme i området. Blant dei som verkeleg har fått merka det på buskapen sin, er Katrine Haugland frå Skeie. Kor mange dagar sauen hadde gått slik er uråd å seia, men fluger og flugemakk var allereie på plass då Katrine Haugland fann sauen sin like innanfor Brandvika i Bjørnebølsbeitet.

– Eg har meldt denne saka til politiet, men dei har ikkje noko å gå etter, så påkøyrsla blir ikkje etterforska vidare. Men den som køyrde på skulle ha meldt i frå. Namn og telefonnummer til eigaren står i klypene på øyra til sauen, påpeikar ho.

Meldeplikta

Ei veke før den store sauesankinga, møter Grenda fem av dei mange bøndene som har dyra sine i fjellet på staden der dei skal samla sauene inn, ved den felles kvia innanfor Grøningen. Dei er alle opprørte over at dyr blir påkøyrte, utan at det blir meldt i frå om det.

– Eg reknar med at det er ein del mørketal her. Har du eit dyr som er skada i foten, så tar du det heim. Det er ikkje like godt å vita kva som er grunnen til skaden, for dei er ikkje så skada at dei ikkje kan fota seg. Men dette me opplevde no er i ein eigen klasse, seier Haugland

– Det er simpelt å ikkje melda i frå, tykkjer Bjørn Helge Skåle.

– Du kan bli kraftig bøtelagt for å ikkje melda i frå, både for husdyr og vilt, medan du ikkje blir økonomisk straffa for å melda i frå.

Skåle har 218 vinterfôra sauer gåande på Fjellhaugen-sida, og er elles styremedlem i Kvinnherad Sau og Geit. Leif Skeie, Ingolf Naustvik og Eivind Larsen er også i med, sistnemnde med dottera Oda Røssland Larsen (8) og kona Henriette Røssland med seg. Dei har som Haugland sauene gåande på Bjørnebølesbeitet.

Enorm aktivitet

– Med den aukande trafikken som no er innover mot Blådalen, så ser me med bekymring på å ha sau i beiteområdet her. Ein skal ikkje gå langt tilbake i tid då det var ordna forhold med tanke på trafikkmengda her. Det er ikkje tilrettelagt for den trafikken som er her no, og det er aktivitet både dag og natt, oppsummerer Haugland.

– Me er på hytta vår ved Ågotelv mykje, og har veldig god oversikt over trafikken som er her. Det har auka kraftig dei siste åra, seier Eivind Larsen.

– Det er ein enorm aktivitet her, istemmer Ingolf Naustvik.

Dei på Bjørnebølbeitet leiger av Kvinnherad kommune, der dei betaler leigetakst etter kor mange dyr dei hentar heim på hausten.

Alle fem der er ganske sikre på at dei har dyr som er blitt påkøyrde i løpet av dei tre siste somrane, men ingen av dei har fått telefon om at nokon har køyrt på.

– Eg henta heim eit skada dyr her tidlegare i haust, men eg kan ikkje seia om det er påkøyrt. Det gjekk ei lita stund før vi måtte avliva dyret, seier Larsen.

– Alle kan vera uheldige, men det viktige er at ein seier i frå, slår Leif Skeie fast.

Når ein først er inne på problem for sauebøndene; lause hundar er ein anna.

– Bandtvanglova gjeld berre fram til 20. august, og me kjem til å senda eit brev til kommunen om dette, varslar Skåle.

Blant dei ferske døma på konsekvensar av at hundar jagar laust, er at ein av sauene til Idar Bjørgen vart jaga på Staffivatnet for nokre veker sidan. Sauen vart funnen med blodig munn og merke etter bitt.

– Sauene går aldri på vatnet utan at det er snakk om liv eller død, konstaterer Ingolf Naustvik.

Storinnsamling

I alt er det rundt 3000 sauer rundt i Fjellhaugen, Bjørnebøle og innover mot Blådalen som skal heim dei neste vekene. Førstkomande laurdag og søndag blir dei aller fleste av dei ruta ned til dei ulike kviene som står i området.

Ingolf Naustvik skal ha sine tilbake til Røyrvik, Eivind Larsen til Sundsteigen, Bjørn Helge Skåle har garden sin i Rosendal, og både Leif Skeie og Kathrine Haugland held til på Skeie på Seimsfoss.

– Men her er sauer både frå Halsnøy og Bømlo i fjellet også, fortel Skåle.

– Det er stor aktivitet her til helga. Sauene går gjerne på asfalten når dei kjem seg ned, og då er det ikkje til å koma i frå at det blir litt trengsel på vegen, seier Øyvind Larsen, og bed om forståing frå køyrande som har tenkt seg oppover i fjellet.

– Me skiltar fleire plassar nett den helga når det er sauesanking, men ein skulle kanskje hatt meir og betre skilting i området gjennom heile sesongen om at det er sauer i fjellet, foreslår Kathrine Haugland.

Ho har helst lyst å unngå fleire tilfelle som den påkøyrte sauen som eigentleg utløyste dette varskuet.

– Og meld i frå om du er uheldig, oppmodar ho til slutt.

PS: Saka er oppdatert tysdag kl. 21.47 med korrigering av somme av stadnamna i saka.