Får litt økonomisk naudhjelp

Vidsyn musikkfestival søkte om 150.000 kroner til å dekka underskotet. Formannskapet landa på ein betydeleg lågare sum.

Til formannskapsmøtet torsdag låg det føre eit såkalla referert skriv om Vidsyn musikkfestival. Det vil seia at saka eigentleg berre var til orientering og utan innstilling, men kunne løftast opp til ordinær handsaming om politikarane ynska det. Det gjorde dei.

Bakgrunnen var at Vidsyn musikkfestival, som ekteparet Ingve og Hanne Hesjedal i Rosendal stod bak, den 25. august sendte brev til kommunen med bøn om økonomisk naudhjelp. Arrangementet var svært vellukka teknisk sett, og tilbakemeldingane frå artistar, frivillige og publikum veldig gode. Men diverre var det ikkje mange nok av sistnemnde. Festivalen trengte 600 gjester kvar kveld for å gå i balanse, medan resultatet vart 290 betalande fredagen og 350 laurdagen. Det medførte eit underskot på heile 338.000 kroner.

– Om vi ikkje får henta inn kapital frå eksterne, så må dette underskotet hentast frå vår privatøkonomi, stod det i brevet.

Dei har bede om meir bidrag frå sponsorane. I tillegg starta ein publikummar ein Spleis-aksjon, og den samla inn fine 115.200 kroner. Og ikkje minst søkte Vidsyn om 150.000 kroner i det dei kalla økonomisk naudhjelp frå kommunen. Dei bad om at søknaden vart behandla ved fyrste høve, sidan dei hadde rekningar som stod til forfall. Men grunna valet har dette teke tid.

Vågalt initiativ

Formannskapet var litt usikre på kva som var rett å gjera.

– Det er vanleg å søkja om underskotsgaranti og gjera eit forarbeid. Eg føler vel at her har dei gått andre vegen. Samstundes er det viktig å visa støtte, og vi bør kanskje senda signal om at vi kan vera positive til å gje tilskot til komande festivalar, funderte Ove Lemicka (Frp).

Veronica Thorkildsen Thorsen (Sp) bad om å få vurdert sin habilitet, sidan ho er partikollega med Ingve Hesjedal. Ho vart samrøystes erklært habil.

– Når vi veit kor vanskeleg det er å skapa noko i Kvinnherad, så bør vi kanskje vurdera å bidra. Har vi dessutan vore tydelege på at ein må søkja om underskotsgaranti på førehand? sa ho.

Thorsen la til at Kvinnherad brukar mykje mindre på kultur enn samanliknbare kommunar.

– Det var eit vågalt initiativ, men vi treng at folk satsar. Men det blir vanskeleg når dei skal sitja igjen med alt ansvaret sjølve, filosoferte ho.

Prinsipielt

Jostein Rødland (INP) tykte Vidsyn musikkfestival var eit veldig bra initiativ.

– Dei har ikkje søkt om underskotsgaranti, men kanskje skuldast det at dei er nye og ikkje veit kva dei kan søkja om, sa han, og la fram forslag om å gje 150.000 som omsøkt.

Problemet var at i saka før hadde formannskapet løyvd 100.000 kroner til julegåveaksjonen, slik at deira dispensasjonskonto berre hadde 97.000 kroner igjen. Då kom Per Harald Havnen Löfgren Johansen (Ap) med eit anna forslag.

– Det er ei prinsipielt vanskeleg sak, for i alle slags næringar vil det vera eit element av risiko, der ein kan tena pengar viss det går bra, eller tapa viss det går dårleg. Eg har sett på kva vi har gjeve i tilskot til andre festivalar i år, og vil difor føreslå 15.000 kroner, sa han.

– Då gir vi litt støtte, utan at det går langt utover dei prinsipielle grensene, utdjupa Johansen.

Dette vart samrøystes vedteke.