Fart, futt og fridom på to hjul

Kvinnherad motorsportklubb talte rundt 100 medlemmar ved sist årsmøte. Eit knippe av desse nytta den fine og kalde ettermiddagen 20. oktober til å spinna rundt på bana ved Fuglatjørn i Matre.

Eit greitt utval tohjulingar køyrer utrøytteleg, runde etter runde, medan ettermiddagssola sakte forsvinn bak fjella.

Grusen, som er tørr etter nokre etterlengta haustdagar med opplett, flagrar både på den store og den vesle bana i Midthølen.

Ein uredd sjuåring frå Omvikdalen er blant dei som elskar å køyra fort, og nettopp dette får han heldigvis gjort til gagns denne ettermiddagen.

– Det er gøy å køyra cross. Det kjekkaste er å køyra fort på den store bana. Eg er ikkje redd, seier Kristoffer Hjelmeland Flatebø då han aller nådigast parkerer tohjulingen sin, ein Yamaha, for å få seg litt drikke.

Kristoffer var berre eitt år gamal då han sat på ein minicrossar for første gong. Då vart han rulla rundt på tunet av far sin Arild Flatebø utan at motoren var i gong.

– Denne har eg hatt i eitt år, men eg har køyrt litt heime i tunet før det igjen. Men den eg køyrde då var ein sånn liten, forklarar han.

Til samanlikning: Setet på Yamahaen som står parkert er truleg rundt ein halvmeter over bakken.

– Kva synest du om bana her då, er den perfekt eller ville du hatt noko annleis?

Sjuåringen tenkjer seg litt om før svaret kjem.

– Det hadde vore litt kult om ein kunne velja om ein ville hoppa eller ikkje. At dei som ikkje vil eller tør å hoppa heller kunne køyrt på sida av hoppet, seier han.

Sjølv meiner han det er kult å hoppa, men han har stor forståing for at ikkje alle deler den innstillinga.

Etter å ha køyrt på bana ved Fuglatjørn i eitt år har han blitt litt kjend med fleire som har den same interessa, men han kunne gjerne tenkt seg at fleire av ungane frå Omvikdalen òg vart med å køyra.

Større miljø på ønskelista

Den vurderinga, altså den om at dei gjerne skulle vore fleire, deler dei eldre ungdommane.

– Det er litt lite folk, seier Ole Jacob Vågen (15) frå Husnes, og forklarar ein av grunnane til at dei gjerne skulle vore fleire.

– Jo fleire medlemmar som er med, jo meir støtte kan ein få frå kommunen. Jo meir støtte ein får, jo større bane kan ein få.

Han har med seg Bjørg Ommer Bjelland (15) frå Halsnøy, som berre er med for å sjå på.

– Kanskje eg blir med å køyra neste sesong, smiler ho, og legg til at ho berre er der som støtte.

Eirik Heggenes Anuglen (17) frå Husnes kunne òg tenkt seg eit større miljø. Han byrja å køyre crossar då han var 14 år, og er, som Kristoffer, ikkje redd for å køyre fort på den store bana.

– Me har vore med på nokre treningssamlingar, der var det veldig mange andre, så det har vore kjekt, fortel han.

Medan minicross-gjengen blir veifta av det store motocrosseldoradoet, er det snart på tide med nokre nye rundar i grusen for dei eldste.

Sander Enes (13) frå Ænes gjer seg også klar.

– Eg fekk denne i februar, så eg har snart køyrt eitt år, fortel han, og smett inn at han tykkjer motorcross er veldig kjekt.

Så kickar han motoren i gong og svingar innpå den fartsfylte leikeplassen.