Fleirtalspartia seier nei eigedomsskatt og ja til tillitsreform

Onsdag la kommunedirektøren fram sitt forslag til budsjett for 2021. Torsdag kjem fleirtalspartia med pressemelding om sine reaksjonar.

Koalisjonen tar til orde for å tenkja nytt i ei utfordrande tid, og tar til orde for ei tillitsreform. – Fleirtalspartia seier eit klart JA til ein tillitsreform i vår kommunale organisasjon. Ein reform som byggjer oppunder all den gode kompetansen som er bygd opp over lang tid. Ein tillitsreform skal gje oss betre ressursutnytting, mindre byråkrati og økonomisk innsparing. Til dømes er me av ein klar oppfatning at både sjukefråvær, innleige av konsulenttenester og høg del av vikarbruk skal reduserast, skriv Sosialistisk Fellesliste, Arbeiderpartiet og Senterpartiet i den felles pressemeldinga.

Mindre handlingsrom

Det vankar skryt til administrasjonen for framlegget til budsjett for 2021 og økonomiplan for perioden 2021 til 2024.

– Det har vore eit omfattande arbeid, med rike detaljer på korleis ein ser for seg den økonomiske utviklinga for Kvinnherad kommune dei komande åra. Sosialistisk Fellesliste, Arbeiderpartiet og Senterpartiet vil rose kommuneadministrasjonen for eit godt gjennomarbeidd dokument og framlegg, skriv dei.

– I lys av framlegget ynskjer fleirtalskoalisjonen å synleggjera nokre politiske forventningar og målsetnader allereie no, før det vidare arbeidet som skal leggast fram i formannskapet den 12. november, og endeleg vedtakast i kommunestyret den 26. november.

Det herskar liten tvil om at Kvinnherad kommune, som resten av kommune-Norge, får stadig mindre økonomisk handlingsrom i kraft av dei overføringar som ligg i frå staten. Omfanget av tenester og tenestenivå, står ikkje i stil til kva dagens regjering tilgodeser oss økonomisk. Større rammer til å løyse dei kommunale oppgåvene er naudsynt. Difor vil eit regjeringsskifte neste haust, kunne hjelpe vår kommune med auka inntektsrammer.

Nei til eigedomsskatt

Partia kjem også med ein klare lovnad om å seia klart nei til auke i eigedomsskatt for private bustader og fritidsbustader.

– Ein legg ikkje ansvaret for den økonomiske utviklinga, i opne armar til innbyggjarane, meiner dei.

Partia avsluttar den felles pressemeldinga slik:

– Gjennom samarbeidsavtalen som blei heimla i fjor, har Sosialistisk Fellesliste, Arbeiderpartiet og Senterpartiet tydelege og klare målsetnader for å starte ein tillitsreform. Dette arbeidet vil me starta opp i 2021. Politikarane skal arbeide tett i prosjektstyringa av denne tillitsreformen, og være med å ta ansvar i krevjande tider. Det er naudsynt å tenkje nytt, i utfordrande tider.