Folkehøgskule-elevane førebur seg til to innsamlingsaksjonar

Søndag 27. mars gjer elevane ved Sunnhordland folkehøgskule ein innsats - både for kreftsaka og for Ukraina.

Elevrådet ved skulen har lenge hatt ein avtale med Kreftforeningen om å gjennomføre ein aksjon i samband med Krafttak mot kreft.

– Dei kontakta oss ei stund før jul og lurte på om vi ville vera med i år òg. Sjølvsagt skulle vi vera med. Tidlegare har elevane gått rundt med bøsser, men på grunn av korona valte vi å laga ei strøymesending i staden, fortel Gard Kvilvang, som er ein av dei to ansvarlege for denne.

Når ut til mange

Med seg har han Petrine Sjåstad, som understrekar at dei på denne måten kan nå ut til mange fleire.

– No kan vi jo få vist det til foreldra våre som bur langt vekke, og vi håpar at folk vil støtte aksjonen. Det blir show der elevane stiller opp med det dei ønskjer å vise fram. Her blir alt frå dans, song, band, skodespel, nokre skal vise dataspel dei har laga eller kunstverk. Det blir ganske variert, forklarar ho.

For å sjå showet kan ein finne lenka på folkehøgskulen sin nettstad eller på Facebook. Der vil dei også informere om korleis ein kan støtte aksjonen deira.

– Alle pengane vi får inn går uavkorta til Krafttak mot kreft, forsikrar Gard.

Støttekonsert på samfunnshuset

Same dag blir det ein heidundrande konsert til inntekt for Ukraina. Her er det musikklassen og elevane frå musikkproduksjon som står for initiativet.

Situasjonen i Ukraina gjorde at Nora Lohmiller vart stressa og ho ynskja å hjelpa på eitt eller anna vis. Det var då ho kom på ideen om å arrangera ein støttekonsert for Ukraina.

Saman med Helene Hasselknippe jobbar ho no for å lage programmet for konserten som blir halde på Halsnøy Samfunnshus førstkomande søndag.

– Konserten blir med elevar frå musikk og musikkproduksjon, der nokre av låtane er eigenskrivne og andre er coverlåtar. Vi har også invitert lokale band til å bli med, og fristen for å melde seg er onsdag, 23. mars, fortel dei.

Publikum treng ikkje betala inngangsbillett, men vert oppmoda til å gi pengar til ein spleis som blir oppretta for høvet.

– Det er veldig gøy å kunne gjere noko, at vi kan bidra med det vi kan, seier Helene, medan Nora nikkar engasjert.

– Alltid nice å hjelpe andre

I løpet av intervjuet får dei melding om eit lokalt band som vil bli med på støttekonserten, det unge rockebandet Inator frå Husnes, noko som gjer initiativtakarane hoppande glade. Men det er framleis mogleg å melde seg som bidragsytar.

– Det er alltid nice å hjelpe folk som treng det. Vi har all slags talenter her, og då er det mykje lettare for oss å stelle i stand noko slikt. Samstundes får vi brukt kreativiteten vår på noko bra. Vi håpar at lokalbefolkninga har lyst å ta turen, smiler Helene.

Avtroppande rektor, Mona Økland, er stolt over engasjementet som elevane viser, både i samband med Krafttak mot kreft, og støttekonserten.

– Det er fantastisk bra og viktig det dei gjer. Eg er veldig stolt av dei som berre set i gong og jobbar for andre, sluttar ho.