For første gong på nesten tre månadar er det ingen koronapasientar innlagt i Helse Fonna
I dag er det for første gong sidan 3. februar ingen pasientar med Covid-19 innlagt i Helse Fonna.
Etter ein relativt tøff og hard koronavinter i Nord-Rogaland, Sunnhordland og Hardanger, er det i dag – for første gong på nesten tre månadar – ingen pasientar med Covid-19 innlagt på Helse Fonna sine sjukehus i Haugesund, Odda og på Stord. Det er administrerande direktør Olav Klausen svært glad for.
– Det var nokre tøffe veker då det stod på som verst, med innlagde Covid-19-pasientar på alle våre sjukehus, der fleire av desse fekk intensivbehandling. Medarbeidarane våre har gjort ein formidabel innsats, og eg vil også rosa kommunane og innbyggjarane i regionen, som har ofra mykje for å slå ned denne smittebølgja, seier Klausen i ei pressemelding.
Artikkelen held fram under annonsen.
På det meste hadde Helse Fonna tolv koronapasientar innlagt den 29. mars. Til samanlikning var det aldri meir enn ti pasientar med Covid-19 innlagt i helseføretaket då pandemien braut ut i fjor vår.