Føredrag med Eli Kari
Måndag kveld vert det nok folksamt på Folgefonnsenteret når Eli Kari Gjengedal kjem for å halda føredrag om ekstremvêr.
«Ekstremvêr og endringane vi ser i klimaet» er den fullstendige tittelen på føredraget som Eli Kari Gjengedal, vêrmeldar og vêrsjef i TV 2, skal presentera.
– Vi har i det siste opplevd ekstremvêr fleire stader i verda, også i Norge (Utvik). Desse hendingane er ei påminning om endringane som skjer i klimaet, og som mange stader har hatt og vil få alvorlege følgjer. Vêret dei neste hundre åra vil bli mildare, våtare og villare, seier ho i ei pressemelding.
Artikkelen held fram under annonsen.
Turen til Rosendal skjer i samband med at Folgefonnsenteret har inngått eit spanande samarbeid med TV 2 Skole og Storm Geo. Ho vil difor også seia litt om dette samarbeidet og kva ein kan få ut av det.
Fleire bøker
Eli Kari Gjengedal, som utan tvil er den mest kjende og profilerte vêrmeldaren i Norge, har òg skrive fleire bøker om vêr og vatn. Desse vil det framover vera mogleg å få kjøpt på Folgefonnsenteret.
– Vi gler oss veldig til dette dagsaktuelle føredraget som tar opp eit svært viktig tema som påverkar oss alle, uansett kor vi bur i verda. Med Eli Kari Gjengedal sine evner til å formidla kompliserte samanhengar på ein lettfatteleg og engasjerande måte, har vi heilt klart noko å gle oss til, seier Knut Førland, styreleiar i Stiftinga Folgefonnsenteret, i pressemeldinga.