Føreslegne til Folkehelseprisen

Uskedal helselag har nominert ekteparet Astrid og Pål Haugland til Folkehelseprisen 2021.

Det er Nasjonalforeningen for folkehelsen som står bak den prestisjetunge prisen. Uskedal helselag har fremja forslag om å tildela heidersteiknet til Pål og Astrid Haugland, som har meir enn 50 aktive år bak seg i helsebringande tiltak for andre.

– Begge har lagt ned eit enormt tal dugnadstimar på eit breitt felt. Alltid positive, og med det for auga at aktiviteten skal vera tilpassa alle utifrå alder, funksjon, målsetjingar og ønske, kommenterer Thor Inge Døssland.

I sjølve forslagsbrevet skriv Klara Bakke, på vegner av Helselaget, at Astrid (f. 1947) og Pål Haugland (f. 1945) begge gjort ein uvurderleg innsats for folkehelsearbeidet i Kvinnherad gjennom ein periode på meir enn 50 år.

«Gjennom heile denne tida har dei vore svært aktive både som leiarar, trenarar, tilretteleggjarar for gode helsebringande, fysiske og sosiale aktivitetar. Dei har alltid stått heilt framme i dugnadskøen. Engasjementet har vore over eit breitt felt med aktivitetar, men det har alltid vore viktig og grunnleggande for dei at, i tillegg til fysisk utvikling og velvære, har det sosiale gjennom eit inkluderande fellesskap lege i botnen.», skriv ho.

I mange tilfelle har det vore stort aldersspenn i treningsgruppene, frå cirka 10 år til godt over 70.

«Dei har alltid tilpassa aktivitet og tilbod til kvar enkelt sine behov. Dette har gjeve særdeles mange stor glede av vera fysisk aktive. Det gode miljøet som har blitt skapt, har vore viktig for fellesskap, samhald og trivsel i bygda. I tillegg til å vera direkte involverte i positive aktivitetar, har dei også vore drivkrefter som tilretteleggjarar i mange dugnadsprosjekt som har vore viktige for eit rikt aktivitetstilbod, slik som til dømes turløyper, langrennstrasé, idrettsbanen «Heio» osv», heiter det.

 

Stor aktivitet

For å gje ein betre oversikt over den store og viktige aktiviteten til dei to kandidatane, har Helselaget delt det opp gruppevis:

Turn- og trimgrupper:

«Astrid har vore svært sentral i turngruppa i Uskedal idrettslag heilt frå 1979», vert det opplyst.

Fri-idrett:

«Astrid var trenar og drivkraft i fri-idrettsgruppa i Uskedal idrettslag i perioden 1979-84. Pål tredde ofte støttande til ved behov», står det her.

Fotball:

«Pål kom med i idrettslaget då han var 10-12 år og var aktiv i fotball og ski. Han spela aktivt på A-laget frå han var 15 til han var 36 år. Etter den aktive karrieren blei han trenar på alle nivå frå lilleputt til A-lag».

Bane:

«Pål var med i banenemnda for idrettsplassen på Heio i meir enn 20 år. Som bonde har han også vore svært behjelpeleg ved behov for traktor og andre landbruksreiskapar».

Ski:

«Frå 1980 fekk skigruppa i idrettslaget eit solid oppsving. Pål var sentral i dette, og det vart organiserte treningar også utanom langrennssesongen. Han har no hatt trenaransvar i cirka 50 år. Pål blei etter kvart ein høgt akta trenar i skimiljøet i fylket. Dermed vart han med i Topptrenargruppa, og der fekk han årlege kurs saman med dei fremste langrennstrenarane i Ski-Norge på Toppidrettsenteret».

«Astrid kan også sjå tilbake på aktive år i skigruppa. Ho hadde ulike støttefunksjonar og var mellom anna trenar for barn med styrke og kondisjon som sitt felt frå 1991 til 2000».

Turgruppe:

«For Pål og Astrid og resten av familien har det heile tida vore ein familieaktivitet å tilretteleggja for turaktivitetar for andre. Mange liter raudmaling har gått med gjennom åra til merking av turløyper for turlaget»

Dugnadsgruppa:

«Dugnadsarbeid har vore sentralt i familien Haugland sitt liv i mange samanhengar, ofte på prosjekt som sikrar helsegevinst. Etter nyttår 2019 tok Pål Haugland initiativ til å etablera ei dugnadsgruppe som kunne vera til nytte i bygda.  Dette blei ein suksess, og kvar torsdag møtest no 12-15 pensjonistar til dugnadsarbeid og kaffidrøs».

Avgjerda om kven som vert tildelt prisen vert teke litt etter påske.