Førre sesong rauk sigeren i siste serierunde, no går Bjarte for gull i Grenda-ligaen

Bjarte Keilen frå Rosendal har mykje å revansjera når han no førebur seg på ein ny sesong i Grenda sin Fantasy-liga.

Etter å ha lege i tet i store deler av førre sesong, såg Bjarte Keilen ut til å surfa inn til siger i Grenda-ligaen då det stod att éin kamp i Premier League. Men Øyvind Bjørnevik frå Halsnøy ville det annleis. Med ein imponerande poengfangst i siste kamp, klatra karen frå Halsnøy forbi Keilen og opp på 1. plass i Grenda sin Fantasy-liga.

– Eg låg an til å knusa inn til siger, men det var dessverre ikkje nok. Det var sjølvsagt kjedeleg å mista sigeren i siste runde, men Fantasy blir avgjort over ein heil sesong, og det er sluttresultatet som tel, seier Keilen.

Mykje handlar om flaks

Han er difor glad for at Grenda no går laus på sin tredje sesong med Fantasy, der vinnaren stikk av med ein fotballtur til England. Då får han nemleg sjansen til å revansjera det bitre tapet.

– Eg går for gull i år. For å klara det så må ein gjera seg opp gode vurderingar og følgja med på litt statistikk. Men ein kjem ikkje unna ein ting som har stor betyding i Fantasy, og det er flaks. Uansett kor mykje analysar ein køyrer, så er det ikkje gitt at ein får betalt for det. Det handlar vel så mykje om å vera heldig, seier Keilen.

31-åringen var ein av i alt 339 spelarar med tilknyting til Kvinnherad som kjempa i Grenda sin Fantasy-liga førre sesong. Og sjølv om det enno er nokre veker til Premier League sparkar i gang, har Keilen allereie byrja å førebu eit slagkraftig mannskap til den komande sesongen.

– Eg byrjar så snart å bli klar til sesongen, men eg har ikkje vore inne og flikka så veldig mykje på det enno. Ein er jo alltid litt lei Fantasy når sesongen er over, men eg kjenner at eg gler meg til det set i gang igjen. Så gler eg meg stort til å vera med i Grenda-ligaen. Det har vore veldig kjekt dei to føregåande sesongane, seier Keilen.

– Endeleg

Redaktør Håvard Sætrevik gler seg over at Grenda for tredje sesong på rad kan tilby kvinnheringar i alle aldrar ein slik Fantasy-konkurranse.

– Me ser fram til at konkurransen kan koma i gang igjen. Med langt over 300 deltakarar førre sesong, i alder frå barneskuleelevar til pensjonistar, så er det klart at me må gjenta suksessen. Det er ein konkurranse som spenner breitt og engasjerer stort, og det fører også til at prestisjen blir deretter, seier Sætrevik, før han legg til:

– Endeleg kan me som meiner me veit best få visa det i konkurranse med andre betrevitarar. Dessverre tilseier tidlegare års erfaringar at det går til pises før me er ferdige med tredje runde, humrar han i ein augneblink med sjeldan sjølvinnsikt.

Podkast

For at det ikkje skal gå til pises for Bjarte allereie i tredje runde, høyrer den utflytta rosendelingen ein del på podkastar, slik at han har koll på både treningskampar og kva spelarar som etter alle solemerke kjem til å starta for dei ulike laga.

– Og så tenkjer eg mykje på det til alle døgerets tider, både på godt og vondt, seier han.

Sjølv om han framleis ikkje har klart å spikra laget til fyrste serierunde, er han klar på ein spelar som han trur må med frå fyrste spark på ballen.

– Det er litt vanskeleg denne sesongen, sidan det har vore EM og Copa Amerika, men det er fort vanskeleg å gå utan egyptaren til Liverpool. Salah har fått kvila heile sommaren og peikar seg ut som den opplagte ein må ha på laget, seier Keilen.

Ligakode

Grenda-ligaen er allereie opna for påmelding, og alle som har tilknyting til Kvinnherad kan vera med. Vinnaren stikk som kjend av med ein fotballtur til England, og skriv seg i tillegg inn i den eksklusive vinnar-klubben saman med Håkon Haga og Øyvind Bjørnevik.

Alle som var med førre sesong, og som lagar seg eit Fantasy-lag på same brukaren, er automatisk påmeldt i Grenda-ligaen. Dei som er nye, eller som har laga seg ny brukar, kan melda seg på ved å bruka ligakoden: VOWTY2.

Her kan du gå for å laga deg lag: