Forskar Grand Prix: Vann Vestlandsfinalen

Løfallstrendingen Marthe Bygstad-Landro (38) gjekk heilt til topps i landsdelsfinalen under Forskar Grand Prix i førre veke.

Under Forskingsdagane i førre veke vart det også skipa til Forsker Grand Prix. Under Vestlandsfinalen fekk ti Bergensforskarar fire minutt kvar til å engasjere publikum og dommarar under formidlingskonkurransen.

Løfallstrendingen Marthe Bygstad-Landro (38) stilte her med si forsking på «Skam».

– Eg har forska på betydninga av skam for menneske som er deprimerte. Under Forskar Grand Prix handla det om å formidla dei stemmene som eg har lytta til i studien min, menneske med depresjonsdiagnosar, fortel Bygstad-Landro til Grenda.

 

Skam

Sigeren i Bergen på onsdag sendte ho til landsfinalen i Tromsø. Der nådde ho ikkje opp til superfinalen, men ho er likevel veldig nøgd med eigen innsats.

– Eg følte igjen at eg fekk bera fram dei stemmene som vanlegvis ikkje blir høyrde, og at dei fekk nå ut til eit større publikum, seier ho.

Dei kan nå ut til eit endå større publikum når NRK sender både landsdelsfinalar og sjølve finalen seinare i haust.

Bygstad-Landro er oppvaksen på Løfallstrand men bur no på Askøy og er knytt til VID Vitskaplege Høgskule. Der har ho vel eitt år att av doktorgradskrivinga si. Utdanninga som psykiatrisk sjukepleiar har ho nytta til arbeid både for Kirkens Bymisjon, i fengsel og på psykiatriske klinikkar.

– Dei fleste skammar seg lenge for ein blir deprimert, 90 prosent kjente godt til skamkjensla før dei vart deprimerte. Ein viser skam på ulike måtar, og ein tar i bruk ulike strategiar for å skjula skamma, og det er ikkje nødvendigvis bevisste strategiar. Eit tenkt døme kan vera den unge jenta som vel å vera flink for å skjula at ho inni seg føler ho ikkje er verd noko, eksemplifiserer 38-åringen.

– Ein trur gjerne ein kan alt om skam fordi ein har sett tv-serien «Skam», men ein treng å rydda litt i omgrepa. Sunn skam må me ikkje gløyma, ein må behalda «skammavitet», men det er den vonde skamma eg vil til livs, understrekar ho.

 

Nervøs

I den innleiande runden i Forskar Grand Prix fekk deltakarane fire minutt kvar til å presentera si forsking.

– Det var ei slags skrekkblanda fryd å framføra, både i Bergen og i Tromsø. Eg har blitt ei erfaring rikare, seier Marthe om konkurransen.

I bergensfinalen raka ho saman ein seksar og to femmarar frå dommarane, medan ho i Tromsø vart tilgodesett med tre femmarar. Dommarar var Siri Kleiven Strøm (TV2), Sverre Breivik (DNS) og Ingvil Brügger Budal (NLA Høgskolen) var med i dommarpanelet og sette karakterar på framføringa, formidlingstalentet og forskingsinnhaldet til forskarane. I tillegg stemte publikum med mentometerknappar.

– Eg blir alltid veldig nervøs før eg skal framføra noko. Å vera med i denne konkurransen har vore litt eksponeringstrening, og eg merkar at eg har toppa det heile no. Det blir ei mindre nervøs Marthe framover, sluttar ho.