Frisk satsing i motvind

Dei fem herrane bak nyetablerte Oil Comm AS i Herøysundet ser vekk frå nedgangstidene, og satsar friskt på instrumentering, kabelstål, commissioning og mc til skips- og offshorenæringa. 

– Dette er noko vi har snakka om i mange år, og no passa det eigentleg bra. For no var vi arbeidsledige alle mann, og i staden for å gå ut og leita etter jobb, bestemte vi oss for å skapa vår eigen arbeidsplass, seier dagleg leiar i Oil Comm, Egil Smith.

 

Utspring av Skarveland

Og sjølv om dei er fullt klare over dei utfordrande tidene, trur dei den rette kompetansen og nettverket dei tar med seg vil gje eit fortrinn.

– Vi har mykje god og relevant erfaring frå offshore, skip og landbasert industri. Samstundes er det slik at om vi greie å overleva no, så står vi mykje sterkare når marknaden snur, seier teknisk sjef Åge Aakre.

Saman med Egil Smith, Ørjan Fludal, Richard Totland og Eirik Tøsse etablerte han Oil-Comm AS i juni i år, eit selskap som på mange måtar er eit utspring av tidlegare Bergen Group Skarveland. Dei er i dag tilsette i 10 og 20 prosent stillingar, men ser for seg å vera i fullt arbeid med eingong det er arbeid til det.

 

Nye arbeidsplassar

Vi møtte Egil Smith og Åge Aakre i det mellombelse kontorlokalet i gamle kiosken i Herøysundet. Her har dei klekt ut planane som dei på sikt håpar skal skipa mange nye arbeidsplassar i Kvinnherad.

– På sikt satsar vi på å ta inn mange av dei som tidlegare var tilsett i Maritim Service og Bergen Group Skarveland. Og om alt går som vi håpar, har vi eit mål om at vi skal bli 100 tilsette i løpet av nokre år, seier Egil Smith.

Dei har allereie utført arbeid for SKL i Matre og Seismeq på Sunde, og har fått gode tilbakemeldingar på arbeidet dei har gjort. I tillegg til jobbar her til lands, siktar dei seg òg ut mot det store utland.

– Vi jobbar for tida med å få ein samarbeidsavtale med Aibel i Thailand. Vi ser at det er mykje som skjer i Asia, og håper å koma oss inn i den marknaden, seier Smith.

Men sjølv om dei allereie er i godt i gang, er dei klare på at det er tøffe månadar i vente.

– Det blir eit slit å halda hjula i gang fram til mars. Men i mars tar ting seg kraftig opp hjå Apply og Kværner på Stord, og då skal vi vera klare, seier Smith.

Då er dei òg på plass i nytt produksjonslokale her i Kvinnherad.

– Vi har fått fleire tilbod frå ulike stadar i kommunen, og er no i sluttforhandlingar om eit produksjonslokale. Så vi kjem nok til å flytta i november, seier Smith.