Frivilligprisen til ekteparet Lamberg-Torjusen

Frivilligprisen 2020 går til ekteparet Kristin Lamberg og Trygve Torjusen for arbeidet dei legg ned for Rosendal Samfunnshus.

– Det er ei stor gleda å sjå at samfunnshuset i Rosendal er meir innbydande enn nokon gong. Fremst i dette arbeidet har Kristin og Trygve stått i år etter år, står det å lesa i nominasjonen av ekteparet.

Trygve Torjusen er styreleiar for huset, medan Kristin Lamberg er leiar for Rosendal Musikklag og ei eldsjel som «brenn» for samfunnshuset.

– Kristin og Trygve arrangerer dugnadar og har sjølve lagd ned atskillege timar i huset. Under deira leiing er det dei siste åra blitt gjennomført store reperasjonar og utbetringar både utvendig og innvendig. Utstyr er blitt skifta ut og forbetra, kjøkenet er svært godt utstyrt, slik at huset i dag står som svært tiltalande og brukarvenleg til ulike arrangement, både private og offentlege, står det å lesa i ei pressemelding.

Komiteen for årete frivilligpris gratulerer dei verdige vinnarane. Og skriv at høgtideleg overrekking og markering av årets pris vert gjennomført på nyåret når koronasituasjonen har roa seg.