Frp og MDG inngår samarbeid

Noko overraskande har Framstegspartiet og Miljøpartiet Dei grøne funne saman i eit valteknisk samarbeid.

Avtalen, som kom på plass i helga, sikrar Ove Lemicka plass i formannskapet. Til gjengjeld får MDG følgjande utteljing:

Artikkelen held fram under annonsen.
•  Fyrste varamedlem til formannskapet, Arne Gjerde. Resterande varamedlemmer får Frp.
•  Representant til styret i Kvinnherad Energi, Knut Førland.
•  Kandidat til nyoppretta levekårskomité, Eli Hårklau.

– Valresultatet ville normalt gje Frp plass i formannskapet. Men her spelar også matematikk inn, og då vi byrja å analysera situasjonen og studerte notatet som Geir Mogren sendte ut til alle partia, fann vi der døme på andre parti kunne samla seg og ta plassen gjennom ulike konstellasjonar. Derfor tok vi kontakt med MDG og Arne Gjerde, drøfta stoda og kom fram til ein avtale, fortel Ove Lemicka.

Han understrekar at det er eit reint valteknisk samarbeid.

– No har vi sikra at veljarane sin dom blir følgd. Dette er slik det skal vera utifrå valresultatet, seier Lemicka til Grenda.

 

Formannskapet

Mykje tyder på at Høgre, Sp, Venstre og KrF finn saman i eit valteknisk samarbeid som sikrar konstellasjonen den siste plassen i formannskapet. Høgre og Sp har allereie valt sine representantar. Sidan den siste må vera kvinne, er berre Marit Årthun (KrF) aktuell. Hege Lægreid Røssland (SV) var lenge kandidat, men då MDG inngjekk avtale med Frp i staden, forsvann den moglegheita. Dermed blir formannskapet slik:

Peder Sjo Slettebø, H

Leif Sverre Enes, H

Sølvi Ulvenes, H

Hans Inge Myrvold, Sp

Gerd-Laura Bondhus, Sp

Johnny Håvik, Ap

Hilde Enstad, Ap

Ove Lemicka, Frp

Marit Årthun, KrF