Fryktar mutert virusvariant i Ullensvang

Ullensvang kommune har sett 19 personar i karantene og ein person i isolasjon etter mistanke om mutert virus i kommunen.

Grunnen til at Ullensvang kommune no har sett i gang koronaførebyggande tiltak med mistanke om mogleg mutert virus i kommunen, er at ein person frå Oslo-regionen har reist til kommunen. Denne personen er definert som nærkontakt i ein utbrotsituasjon i sin heimkommune, der det igjen føreligg mistanke om ein mutert virusvariant.

– Vedkomande er testa lokalt i dag, og har negativt svar på hurtigtest. Likevel har vedkomande symptom som kan vera foreinleg med koronasjukdom, og personen skal testast på nytt. Erfaringa frå dette utbrotet på austlandet viser at folk kan ha smitte sjølv om dei testar negativt i første omgang, skriv ordførar Roald Aga Haug i ei pressemelding.

Kommunen er føre var og har sett i karantene alle dei personane som vedkomande har vore i kontakt med i kommunen.

– Med strenge tiltak no overfor dei påverka, så kan vi isolera og unngå smittespreiing av mutert virus i Ullensvang, dersom nye prøvar viser seg positive, skriv ordførar Roald Aga Haug i pressemeldinga.