Full støtte til oppdrettsprosjekt

Ænes inkubator har ein veg å gå før fylkesmannen er med på planane. Men i formannskapet i Kvinnherad er det full jubel for prosjektet.

Formannskapet godkjente førre torsdag samrøystes planprogrammet for Ænes inkubator sin reguleringsplan.

– Eg synest det er ei kjempesak. Berre sjå til Fjæra, dei har kjempa på og fått det til. Eg vil ynskja dei lukke til, innleia Ove Lemicka (Frp).

Også Knut Johannes Helvik (H) tykte det var ei stor glede å støtta prosjektet, og såg fram til ei betydeleg mengd nye arbeidsplassar.

– Næringa byrjar å bli moden, frå enkle merdar til industri. Næringa er også i ferd med å bli stoverein. Men ein må sjølvsagt bøta på negative verknader så langt det er mogleg, sjølv om det sikkert er tusen gonger fleire positive konsekvensar, sa han.

Grunneigar Leif Sverre Enes (H) var inhabil under handsaminga. Men under ei anna sak kom han med ei melding som ikkje var til å misforstå.

– Vi har eit kjempeproblem med noko som heiter fylkesmannen i nesten alle samanhengar. I Mauranger har vi eit areal som er sett av til næring, men fylkesmannen kjem likevel med innsigelsar, meldte han.