Fylkesvaraordførar til Kvinnherad
Den nye fylkesvaraordføraren i Vestland, Natalia Golis (MDG), kjem til Kvinnherad førstkomande torsdag.
Det er MDG Kvinnherad som har invitert ho, og i tillegg til å møta lokallaget står fleire møter på programmet.
Artikkelen held fram under annonsen.
– Sidan Kvinnherad ikkje er representert i fylkestinget i inneverande periode, er det spesielt viktig å ha god kontakt med den politiske leiinga i fylkeskommunen. Besøket må sjåast i samanheng med dette, og vi er svært glade for at vår fremste fylkespolitikar startar det nye året med ein tur til Kvinnherad, skriv MDG Kvinnherad i ei pressemelding.
Besøket startar med eit frukostmøte på Folgefonnsenteret, eit møte som er ope for alle interesserte. Tema er Næringsutvikling, klima og miljø. Knut Førland vil halda ei kort innleiing om grøne forretningsmoglegheiter, og deretter vil Natalia Golis orientera om den politiske plattforma til fleirtalet i Vestland fylkesting for perioden 2019 – 2023. Fokuset hennar vil vera næringsutvikling, klima og miljø.
Golis skal også ha eit møte med mellom anna ordførar og kommunedirektør i Kvinnherad kommune, der det er venta at kommunen si hydrogensatsing stå på programmet.
Opphaldet i Kvinnherad vert avslutta med bedriftsbesøk/møter med leiinga i SKL og Hydro Husnes, høvesvis i Matre og på Husnes.