Fyller hyllene med rein hudpleie

Una Kolle gjorde hobbyen om til levebrød, og har bygd opp si eiga bedrift Rein Hudpleie stein for stein. Måndag opnar ho butikk i Rosendal.

Gründeren frå Herøysundet har lenge vore på jakt etter eit større produksjonslokale og ein stad å syna fram varene sine. I lokalet til Clinique Rosendal får ho plass til begge deler. Una starta med å laga sin eigen lippepomade heime på kjøkenet i 2012.

– Eg las litt på nettet og fann ut at dette her ikkje er noko hokuspokus. Så bestilte eg bivoks frå ein birøktar eg kjenner, og så berre byrja eg, fortel ho.

 

Frå hobby til heiltidsjobb

I starten gav ho vekk produksjonen i gåver til vener, men skjønte snart at dette var det grunnlag for å selja. Etter kvart utvikla ho nye produkt, og no leverer ho sjampo, såper, salver, kremar og oljer til butikkar over heile landet. I tillegg driv ho sin eigen nettbutikk. Hobbyen har blitt ein heiltidsjobb, og Una gjer alt sjølv. Ho leitar etter den beste emballasjen, designar etikettar, får tak i gode ingrediensar og utviklar oppskrifter. Og så kjem sjølve produksjonen i tillegg.

– Salet går eigentleg så det susar, men folk her lokalt vil gjerne sjå og kjenna, seier Una.

I går var ho ferdig med siste finpuss i lokalet, og måndag er ho klar til å visa fram produkta sine i Rosendal.

– Eg vil selja varer som er sunne og gode for kropp og miljø. Alle produkta er produsert for hand i små produksjonar, og må reknast som ferskvare sidan dei ikkje inneheld konserveringsmiddel, fortel Una.

I tillegg til eigenproduserte varer sel ho også økologiske vaskemiddel og hygieneprodukt.

 

Gler seg

No gler ho seg til å koma i tettare kontakt med kundane.

– Eg har hatt så utruleg trongt lokale at folk ikkje har kunna koma inn og sjå produkta mine. Derfor har det berre vore i nettbutikken, eller ein og annan gong når eg er på messe at folk får sjå dei. No får eg ein stad å visa fram varene mine, seier ho.

Det vert ikkje ope kvar dag i den nye butikken, men Una lovar nokre faste opningsdagar etter kvart. I tillegg vil det vera ope når ho er på det nye kjøkenet sitt for å produsera nye ferskvarer.