Galleristen må tenkja nytt

Allereie for tre år sidan byrja Turid Vikene å laga utstillinga som no heng i Galleri G Guddal.

– Ho har laga kvar einaste verk tilpassa til dei ulike romma dei skulle stå i, seier Gøril Guddal.

Galleristen og kunstnaren starta monteringa av utstillinga tidleg.

– Me byrja allereie 6.-7. mars med å setja ho opp, og var ferdige då Norge vart stengt ned. Og heldigvis er Turid frå Stord, så reisinga var overkommeleg, kommenterer Gøril Guddal.

Utstillinga med Yngve Henriksen som skulle opna 21. mai er utsett til 2021. Det betyr at Vikene si utstilling står til det blir mogleg å opna neste utstilling.

– Det blir i alle fall til 15. juni, reknar Guddal seg fram til.

Råka hardt

– Me som driv sesongbasert næring er avhengige av å kunna samla større folkemengder for at det skal bli butikk av det, og her i Guddal er det i sommarhalvåret me gjer det. Publikum må kunna reisa og koma hit, for at me skal få samla nok kundar. Eg driv nasjonalt, og både Rogaland og Oslo er store marknader for meg. Reisestoppen ein opplever no, råkar hardt akkurat når sesongen skal starta. Det er no framover me legg grunnlaget for årsøkonomien, meiner Guddal.

Ho har aldri lagt skjul på at Baroniet sine arrangement kombinerer godt med det galleriet hennar tilbyr. Dermed kan ein seia at dagens situasjon råkar dobbelt for ho.

– Eg hadde lett hatt 200 i galleriet på laurdag under vanlege tilhøve, med den stemninga og sala som blir utløyst av det. I tillegg kjem blir det grupper som kjem med lunsjbestillingar på slike dagar, og anna servering. Men reising er no stoppa opp, og ikkje får eg servert nokon heller, oppsummerer ho.

 

Avgrensingar

Konsekvensane for Galleri G Guddal er fleire. Dei som skulle starta å arbeida for ho frå laurdag av ikkje får jobb. Galleriet er ope, men på eit knippe vilkår.

– Eg kan ha maksimalt fem inne i galleriet på ein gong, og har av den grunn ikkje ordinære opningstider, men må vita om alle som kjem. Me får vera lukkelege for kvar einaste handel som skjer i denne tida, og håpa at ein klarer å driva vidare, seier ho.

Løn til Gøril Guddal er sett på spissen ei av dei minste bekymringane til Galleri G Guddal.

– Eg har lån, forsikring, straum og ti bygg som må haldast ved like. Eg er spent på kva som blir lagt i pakkane frå staten, som skal vera med på å gjera det råd å halda det gåande gjennom dette. Takk og lov for oljefondet! Eg skal i alle fall ikkje mista motet, legg ho til.

 

Videoopning

Utstillingsopning i galleriet plar alltid vera ei kulturell hending som trekkjer eit monaleg publikum, som poengtert tidlegare. Denne gongen må det gjerast på anna vis.

– Eg har lagt ut ein video som erstatning, der publikum kan gå inn og få ein viss smak av utstillinga. Det yt ikkje verka til Vikene rettferd, men det er ein smakebit. Eg syns det er viktig å få distribuert, sidan folk ikkje kan koma hit, seier Gøril.

Som så mange andre i både sin og andre bransjar har galleristen måtta snu seg.

– Nye tankar må tenkjast og nye grep må takast. Me finn løysingar på det praktiske, kring handel og levering. Fleksibel må eg halda fram med å vera, sluttar ho.