Gamal kraftstasjon skal rivast

Blåfalli II syng på siste verset. Den dominerande bygninga på Opstveit kan bli riven i løpet av året.

SKL søkte om riveløyve allereie i 2007. No er løyvet endeleg på plass og anbodspapira på rivinga er sendt ut. Dermed tyder alt på at arbeidet vil starta opp om ikkje lenge.

Bygginga av Blåfalli II tok til kring 1950. Fyrste aggregatet vart sett i drift i 1953, det andre ti år seinare. Men då Blåfalli Vik opna for få år sidan, var det ikkje lenger bruk for Blåfalli I og II.

– Vi har ikkje behov for bygget. Skulle det blitt ståande, så hadde det blitt eit vedlikehaldsobjekt for oss, eller forfalle etter kvart, seier Arne Helleland, driftsleiar i SKL.

Saman med kollega Egil Åkra tek han Grenda med på omvising i den gule betongklossen, som ligg midt i sentrum av Opstveit. Bygget er faktisk så sentrumsnært at hovudvegen går over ei bru bygd inntil kraftstasjonen.

Å vandra rundt i dei store romma har eit betydeleg historisk sus over seg. Det tykkjer også fylkeskonservatoren, som gav beskjed om at heile bygget måtte scannast før rivinga tek til. Det er no gjort, og ein kan såleis utarbeida 3D-bilete av heile stasen.

Les meir i dagens papiravis eller kjøp pdf-utgåva.