Gav alt i Baroniløpet

Her kan du sjå bilete frå det gjenoppståtte Baroniløpet som gjekk av stabelen i dag. Ronny Nordal vann herreklassen og Hildegunn Håland dameklassen, men det var ikkje berre dei som gav alt denne laurdagen.

Torbjørn Haugland var så sliten at han la seg rett ned etter målgang. Aldersspreiinga i terrengløpet var stor, og innsatsen var på topp hos alle dei påmelde. Dagens løp var det første i Kvinnheradkarusellen i terrengløp. Start- og målstrek var ved Rosendal Avlsgård, og løypene var tilpassa aldersgruppene, med distansar frå 270 meter til 2,5 kilometer.  Dei gode naboane og samarbeidspartnarane Omvikdalen IL & Rosendal Turnlag stod også i år for arrangementet. Vel 90 deltakarar var påmelde, litt færre enn i fjor då 140 stilte til start.

- Det trur eg både har med veret å gjera, og med den førehandsannonserte tvekampen mellom Sindre Omvik og Terje Aggvin i fjor. I år var ikkje dei med, Sindre er ute på grunn av eit virus, og må ta det veldig roleg, seier trenar og RT-leiar Jostein Hatteberg.

Han synest det er kjekt at bygdene kan møtast og samarbeida om eit slikt arrangement.

- Det lovar bra for framtida til friidrettsmiljøet, meiner han.

Meir om løpet, med resultat og fleire bilete, kjem i papiravisa på tysdag.