Gav tilbake til samfunnet
Elevane i valfaget Innsats for andre ved Øyatun brukte tysdagen til å dela ut ein smak av sommar til bebuarane ved Halsnøytunet og i omsorgsbustaden like ved.
Valfaget har dette skuleåret opna drive loppemarknad og bruktbutikk for å få inn pengar til alt det dei har hatt lyst til å bidra med i lokalsamfunnet rundt seg. Tysdag handla det om å dela ut norske jordbær og fløyte til bebuarane ved Halsnøytunet og i omsorgsbustadane som ligg like ved.
Artikkelen held fram under annonsen.
– Vi har hjelpt til med å vaska hus, luka bedd og no deler vi ut norske jordbær. Så det handlar om å gje litt tilbake, seier Maia Pile i 8. klasse.
Ho hadde med seg Malene Kristensen Anthonsen, Frida Øvrevik Forestad, Benedicte Johnsen, Bertine Mygaard, Vetle Tellefsen Hveem, Karoline Duncan og eit lass med ferske jordbær til Halsnøytunet tysdag. Noko fagsjukepleiar Elisabeth Svalland sat stor pris på.
– Berre besøket i seg sjølv er ein glede for bebuarane, så dette er noko vi er veldig glade for. Vi har teke middagen tidleg i dag, så no skal det vera plass til dessert, sa ho.
Vidare delte gruppa seg, der nokon gjekk vidare rundt på dei andre avdelingane, medan Vetle tok turen opp i omsorgsbustadane for å gleda dei med ei velsmakande gåve.
– Dette var veldig kjekt. Eg synest det er flink ungdom som finn på slike ting, og så passer det jo midt i blinken med ei skål jordbær no. Betre dessert finst det ikkje, sa Nils Magne Kloster som kunne fortelja at dei norske bæra var gode på smak.
– Det smakar sommar, sa han.