Gerhardsen frå Ølve sat på Stortinget

Grenda si liste over stortingsrepresentantar frå Kvinnherad må stadig utvidast. Nummer 25 er Gerhard Meidell Gerhardsen frå Ølve.

Gerhardsen vart født i 1848 på Roaldstveit i Ølve. Han var son til Mette Dorthea G. Håvik (1821-1898) og Clement Gerhardsen (1818-1899). Faren var ordførar i Kvinnherad frå 1870 til 1873.

I yrkeslivet var Gerhard Meidell Gerhardsen fyrst skulelærar, så jobba han på kontoret til futen i Sunnhordland, før han i 1872 vart lensmann i Finnås på Bømlo. Samstundes var han gardbrukar. Han gifta seg med Anna Trovik.

Gerhardsen var stortingsmann for Høgre. Frå 1892-1897 og 1903-1906 representerte han Søndre Bergenhus amt. I perioden 1906-1912 møtte han for einmannskrinsen Ytre Sunnhordland. I tida på Stortinget sat han i Gasje- og pensjonskomiteen og Kyrkjekomiteen. Han hadde også fast plass i Lagtinget frå 1903-1912.

Gerhardsen døydde i Kristiania 25. juli 1912 på tampen av 1912-sesjonen.

Det kan elles nemnast at sonen, som også heitte Gerhard Meidell Gerhardsen (1885-1931), var stortingsmann for Høgre og Senterpartiet. Men han var frå Finnås og budde seinare i Etne, og høyrer såleis ikkje med på lista vår.