Gjekk til frontalangrep på kommunikasjonsreglane: – Særleg eigna til å undertrykka kritikk nedanfrå

– Det går eit spøkelse gjennom Kvinnherad, kommunikasjonsreglane sitt spøkelse. Det sa Gaute Lund (SF) i spørsmålsrunden i kommunestyret. – Reglane er ikkje lenger i bruk, lova ordføraren.

Lund nytta høvet i kommunestyret til å fortelja at kommunen sidan tidleg 2000-tal har halde seg med eit sett av kommunikasjonsreglar, utarbeidde i samarbeid med psykologen Jan Atle Andersen.

– Andersen har i åra seinare vore svært omstridd, blant anna for førestillinga om at «mobbing i arbeidslivet er en myte», og særleg då han gjekk så langt som til å seia at barn som vert mobba må læra seg å «ta ansvar for egne følelser», sa Lund og refererte til ein artikkel i Bergens Tidende i februar 2011.

Lund vedgjekk at kommunikasjonsreglane likevel inneheld element som kan ha noko for seg.

– Men: Dei er særleg eigna for å undertrykka kritikk nedanfrå, og til å byggja lojalitet frå mellomleiarnivået og oppover. Dei kan vel så gjerne forsterka problem og konfliktar på arbeidsplassen, som det motsette. Vert dei tolka absolutt, så blir dei til dels absurde. Etter mine observasjonar gjennom 20 år har dei gjort ein god del skade. Eg skal ikkje gå inn i enkeltsaker her, men sjølve reglane taler for seg. At eg «har lov til å spørja, men ikkje krav på svar» og at «eg snakkar med og ikkje om andre» er døme på reglar som lett kan misbrukast til å undertrykka kritikk nedanfrå, argumenterte Lund.

Fella bjørnen

Han fortalde vidare at han gjennom sine åtte år i lokalpolitikken har hatt som mål «å fella denne bjørnen».

– Eg hadde i åra før forsøkt å varsla om desse skadelege reglane både til sitjande ordførar og i media. Men då i 2015, som kommunestyrerepresentant, vart eg veifta av med at kommunikasjonsreglane har ingen plass i kommunen lenger, og då kommunen fekk nye nettsider i cirka 2017, var dei ikkje lenger synlege der. Det er kanskje representantar i dagens kommunestyre som aldri har høyrt om reglane ein gong. Men no har det skjedd noko. Eg har blitt fortalt meir enn ein gong om saker internt i administrasjonen der kommunikasjonsreglane har blitt dregne fram, i 2022. Og på direkte spørsmål så var det ein tilsett som fann dei for meg, i «det gamle intranettet» som visstnok framleis er i bruk, informerte Gaute Lund.

– Desse «reglane» ser ikkje ut til å ville leggja seg ned og døy så lett, sukka han, og spurde rett ut om ei stadfesting på at reglane ikkje gjeld lenger.

Utdaterte

Ordførar Hilde Enstad (Ap) svarte at det er eit viktig spørsmål Lund løfta opp. Ho opplyste at reglane ikkje er tekne med over til det nye intranettet.

– Reglane vart mykje brukt tidlegare, men nye tilsette har kome til, og det har ikkje vore fokus på desse reglane dei siste åra. Leiarane i Kvinnherad kommune har sidan den gong hatt mange ulike verktøy for samhandling. Verdiane i organisasjonsplanen vår er respekt, omsorg, tydeleg og ærleg – desse er styrande for utøving av arbeidet i kommunen og særleg i samhandling mellom dei tilsette, sa Enstad.

– At reglane er utdaterte og ikkje lenger i bruk er drøfta i både kommunedirektør si leiargruppe og med hovudtillitsvalte og hovudverneombod, avslutta ordføraren.