Gladmelding frå Nav: – Lågaste arbeidsløysa sidan pandemien starta

Nav melder om færre arbeidsledige og fleire ledige stillingar i april.

I april var arbeidsløysa i Sunnhordland til saman 2,5 prosent av arbeidsstyrken. Det er ein nedgang på 39 heilt ledige personar samanlikna med månaden før.

– Dette er den lågaste arbeidsløysa i Sunnhordland sidan pandemien starta. Til saman er det 71 færre registrerte arbeidssøkjarar i april enn det var i mars. Me vonar trenden held fram, samstundes som me er førebudd på at smittesituasjon og restriksjonar på kort tid kan påverka marknaden, seier fungerande leiar Anlaug Rygg Svensen i Nav Sunnhordland.

Lenge utan jobb

Talet ledige stillingar auka også frå mars til april. No er det 359 registrerte ledige stillingar hos Nav, som er 78 fleire enn førre månad.

Det er lystige tal for dei som står utan jobb, meiner Rygg Svensen. Samstundes er leiaren uroa for at koronapandemien kan gjera det vanskelegare for enkelte grupper å koma i arbeid. Over halvparten av arbeidssøkjarane i april var også ledige for om lag eitt år sidan.

– Langtidsledige, ungdomar, innvandrarar, personar med funksjonsnedsettingar og dei med hol i CV-en risikerer å bli skyvd endå lengre unna arbeidsmarknaden. No er det ekstra viktig at me hindrar utanforskapen og inkluderer flest mogleg i arbeidslivet, seier Rygg Svensen.

Lågast i Kvinnherad og Sveio

I Sunnhordland er det kommunane Kvinnherad og Sveio som kan visa til lågast arbeidsløyse i april. Dei har begge ei arbeidsløyse på 1,9 prosent av arbeidsstokken. Høgast arbeidsløyse er det på Stord (3,3%) og i Fitjar (3,5%).

– Snittet for heile Sunnhordland er på 2,5 prosent, som er lågare enn snittet for både Vestland (3,4%) og landet (4,0%), står det å lesa i ei pressemelding.