– God disiplin på drifta

Kraftfondet er verdt over 600 millionar kroner, skattetilgangen er høg og overskridingane er mindre enn i fjor. – Situasjonen er ikkje spesielt bra, men den har vore verre før, konkluderer økonomisjef Geir Mogren.

Formannskapet fekk torsdag ei orientering om den økonomiske stoda i Kvinnherad kommune. Ein nøkkelfaktor er om verksemdene klarer å halda budsjetta sine. I fjor enda overskridingane på 19 millionar kroner.

– Vi ligg nok i grenseland til overskridingar, men vonleg mindre enn tidlegare år. Pleie og omsorg ser ut til å ha betre kontroll, dermed er stoda «litt likar» totalt sett. Det er rimeleg god disiplin på drifta, sa Geir Mogren, som drista seg til å spå overskridingar på mellom 5 og 15 millionar kroner.

– Viss det hadde gått bra med alt det andre, så hadde ikkje dette vore så verst, la han til. Med det meinte han at inntektssida har sine utfordringar. Skatt ser ut til å gje kommunen 3-4 millionar kroner mindre i inntekter enn kalkulert. Skattetilgangen er bra, men konsekvensen er at kommunen mister den såkalla skatteutjamninga.

– Utruleg interessant at skattetilgangen er så stor at vi ikkje lenger får skatteutjamning. Det er godt å høyra. Dessutan er det moralsk rett at ein så stor kommune som Kvinnherad ikkje får skatteutjamningsmidlar frå andre, kommenterte ei nøgd Marit Elisebet Totland (KrF).

– Det har du rett i, men vi skulle gjerne hatt dei pengane, svarte økonomisjefen.

 

Låg rente

Kraftfondet har ein verdi på rett over 600 millionar kroner, noko som betyr ein vekst på 40 mill. hittil i år.

– Men for 3-4 veker sidan var verdien 630 millionar. Det svingar veldig, opplyste Mogren.

I budsjettet for 2015 er det budsjettert med 23 millionar i konsesjonsstraum, noko som er 10-15 mill. mindre enn i glansdagane for få år sidan.

– Men straumprisen har gått ned og ned. Eg er redd vi ikkje får inn meir enn 20 mill, åtvara Mogren.

Kommunen har som kjent skyhøg gjeld. Økonomisjefen kunne fortelja at to tredeler no er låst dei næraste åra til det han kallar ei «veldig låg rente».

 

Har ikkje innført eigedomsskatt

Geir Mogren fann grunn til å påpeika at politikarar som snakkar om å fjerna eigedomsskatten, tek litt feil. Kommunestyret har nemleg enno ikkje bestemt at det skal vera slik skatt neste år.

– Det er ikkje eigedomsskatt i 2016 før de gjer eit budsjettvedtak på at det skal innførast. Førebels er denne skatten berre med i økonomiplanen. De skal såleis ikkje fjerna eigedomsskatten, de skal innføra den, sa Mogren.